کانپور کمشنریٹ پہنچے آئی ٹی بی پی جوانوں سے ہنگامہ آرائی کی افواہیں
کانپور میں آئی ٹی بی پی جوان ساتھی کی والدہ کے علاج میں مبینہ لاپروائی پر کارروائی کے مطالبے کیلئے کمشنریٹ پہنچ گئے۔
اتر پردیش کے شہر کان پور میں ہفتے کے روز اُس وقت غیر معمولی صورتحال پیدا ہوگئی جب نیم فوجی دستے آئی ٹی بی پی کے درجنوں اہلکار اسلحہ کے ساتھ پولیس کمشنریٹ پہنچ گئے۔ واقعے کے بعد شہر میں مختلف قیاس آرائیاں شروع ہوگئیں، تاہم بعد میں حکام نے واضح کیا کہ معاملہ کسی احتجاج یا کمشنریٹ کے گھیراؤ کا نہیں تھا بلکہ ایک اہلکار کی شکایت سے متعلق ملاقات تھی۔اطلاعات کے مطابق آئی ٹی بی پی کے جوان وکاس سنگھ اپنی والدہ کے علاج میں مبینہ طبی لاپروائی کے معاملے پر کارروائی نہ ہونے سے ناراض تھے۔ بتایا گیا ہے کہ وکاس سنگھ کی والدہ کو سانس لینے میں شدید دشواری کے بعد شہر کے ایک نجی اسپتال میں داخل کرایا گیا تھا۔ اہلِ خانہ کا الزام ہے کہ علاج کے دوران انفیکشن بڑھتا چلا گیا جس کے باعث بعد میں دوسرے اسپتال میں خاتون کا ہاتھ کاٹنا پڑا۔
اہلِ خانہ نے دعویٰ کیا کہ اسپتال کی مبینہ غفلت کے باوجود نہ تو صحت محکمہ نے فوری قدم اٹھایا اور نہ ہی پولیس کی جانب سے بروقت کارروائی کی گئی، جس کی وجہ سے اہلکاروں میں ناراضی پیدا ہوئی۔ اسی معاملے پر آئی ٹی بی پی سے وابستہ کچھ افسران اور جوان پولیس کمشنریٹ پہنچے تھے۔پولیس کے اعلیٰ حکام نے اس تاثر کو مسترد کیا ہے کہ نیم فوجی اہلکاروں نے کمشنریٹ پر قبضہ کرنے یا دباؤ ڈالنے کی کوشش کی۔ ایڈیشنل پولیس کمشنر لاء اینڈ آرڈر وپِن تاڑا کے مطابق آئی ٹی بی پی کا ایک جوان اپنے سینئر افسران کے ساتھ گفتگو کے لیے آیا تھا جبکہ دیگر اہلکار باہر موجود تھے۔ انہوں نے کہا کہ بات چیت کے بعد اہلکار واپس چلے گئے اور صورتحال مکمل طور پر پُرامن رہی۔
پولیس حکام کے مطابق اس معاملے میں چیف میڈیکل آفیسر سے دوبارہ تفصیلی رپورٹ طلب کی گئی ہے۔ حکام کا کہنا ہے کہ اگر تحقیقات میں اسپتال یا متعلقہ افراد کی غفلت ثابت ہوئی تو قانون کے مطابق کارروائی کی جائے گی۔ دوسری جانب آئی ٹی بی پی کے کمانڈنٹ گورو پرساد نے بھی وضاحت دی کہ اہلکار صرف شکایت کے سلسلے میں ملاقات کے لیے آئے تھے اور میڈیا میں معاملے کو بڑھا چڑھا کر پیش کیا گیا۔یاد رہے کہ اس سے قبل اتر پردیش اور ہریانہ بھی مزدوروں کی کم از کم اجرتوں میں اضافہ کر چکے ہیں، تاہم کرناٹک کی نئی شرحیں کئی زمروں میں اُن ریاستوں سے زیادہ سمجھی جا رہی ہیں۔
