سی جے پی کی پہلی پریس کانفرنس، چھ جون احتجاج کی تیاری تیز

سی جے پی نے پہلی پریس کانفرنس کا اعلان کردیا، چھ جون احتجاجی مظاہرے کی حکمتِ عملی آج میڈیا کو بتائی جائے گی۔

کاکروچ جنتا پارٹی (سی جے پی) نے اپنی پہلی باضابطہ پریس کانفرنس منعقد کرنے کا اعلان کر دیا ہے۔ پارٹی کے مطابق یہ پریس کانفرنس آج بدھ کی شام پانچ بج کر پندرہ منٹ پر نئی دہلی کے کانسٹی ٹیوشن کلب آف انڈیا میں ہوگی، جہاں پارٹی قیادت میڈیا کے سامنے اپنے آئندہ احتجاجی پروگرام کی تفصیلات پیش کرے گی۔پارٹی کی جانب سے جاری بیان میں کہا گیا ہے کہ چھ جون کو مجوزہ احتجاج کے حوالے سے اہم معلومات میڈیا کے ساتھ شیئر کی جائیں گی۔ اسی مقصد کے تحت مختلف اخبارات، نیوز چینلز اور ڈیجیٹل پلیٹ فارمز سے وابستہ صحافیوں اور نمائندوں کو اس پریس کانفرنس میں شرکت کی دعوت دی گئی ہے۔
سی جے پی کے مطابق پریس کانفرنس سے پارٹی کے ترجمان سوربھ داس، وجیتا دہیا اور آشو توش رانکا خطاب کریں گے۔ یہ رہنما نہ صرف احتجاجی مہم کے اغراض و مقاصد واضح کریں گے بلکہ عوامی مسائل اور پارٹی کے مؤقف پر بھی تفصیلی گفتگو کریں گے۔ پارٹی کا کہنا ہے کہ چھ جون کا احتجاج حکومت کی بعض پالیسیوں کے خلاف عوامی آواز کو مضبوط کرنے کی کوشش ہوگا۔
اس سے قبل ہی پارٹی نے اپنے ترجمانوں کے ناموں کا باضابطہ اعلان کیا تھا۔ پارٹی نے معروف تحقیقاتی صحافی سوربھ داس کو چیف اسپوکس پرسن مقرر کیا ہے، جب کہ مصنفہ اور فلم ساز وجیتا دہیا اور آئی آئی ٹی کانپور کے سابق طالب علم آشو توش رانکا کو ترجمان کی ذمہ داری دی گئی ہے۔سیاسی مبصرین کے مطابق سی جے پی کی سرگرمیوں میں تیزی آنے کے بعد پارٹی سوشل میڈیا اور عوامی اجتماعات کے ذریعے اپنی شناخت مضبوط بنانے کی کوشش کر رہی ہے۔ نئی قیادت اور مختلف شعبوں سے تعلق رکھنے والی شخصیات کی شمولیت کو بھی پارٹی اپنی طاقت کے طور پر پیش کر رہی ہے۔ اب دیکھنا یہ ہوگا کہ چھ جون کو ہونے والا احتجاج عوامی سطح پر کس حد تک توجہ حاصل کر پاتا ہے اور سیاسی حلقوں میں اس کا کیا اثر سامنے آتا ہے۔