ایس بی آئی مسلسل چھ دن بند، صارفین فوراً الرٹ ہوجائیں!

ایس بی آئی بینک 23 سے 28 مئی تک تعطیلات، ہڑتال اور بقرعید کے باعث متاثر، صارفین فوری ضروری کام نمٹالیں۔

ملک کے سب سے بڑے سرکاری بینک اسٹیٹ بینک آف انڈیا (ایس بی آئی) کے صارفین کے لیے اہم اطلاع سامنے آئی ہے۔ آنے والے دنوں میں بینک کی شاخیں مسلسل کئی دن تک بند رہنے کا امکان ہے، جس کے باعث صارفین کو مشورہ دیا گیا ہے کہ وہ اپنے تمام ضروری بینکاری کام پہلے ہی مکمل کرلیں تاکہ بعد میں کسی قسم کی پریشانی کا سامنا نہ کرنا پڑے۔موصولہ اطلاعات کے مطابق 23 مئی سے 28 مئی 2026 کے درمیان مختلف وجوہات کی بنا پر بینکنگ خدمات متاثر رہ سکتی ہیں۔ اس دوران برانچوں میں ہونے والے بیشتر آف لائن کام بند رہیں گے، تاہم آن لائن سہولیات جیسے نیٹ بینکنگ، موبائل بینکنگ، یو پی آئی اور اے ٹی ایم خدمات معمول کے مطابق جاری رہیں گی اور صارفین ان سے فائدہ اٹھا سکیں گے۔
تفصیلات کے مطابق 23 مئی کو مہینے کا چوتھا سنیچر ہونے کی وجہ سے ملک بھر میں بینک بند رہیں گے، جب کہ 24 مئی کو اتوار کی ہفتہ وار تعطیل کے سبب بھی شاخوں میں کام کاج نہیں ہوگا۔ اس کے علاوہ 25 اور 26 مئی کو آل انڈیا اسٹیٹ بینک اسٹاف فیڈریشن کی جانب سے ملک گیر ہڑتال کی تجویز پیش کی گئی ہے، جس کے باعث ان دو دنوں میں بھی بینکنگ خدمات متاثر ہونے کا خدشہ ظاہر کیا جا رہا ہے۔بتایا جا رہا ہے کہ ملازمین کی یہ مجوزہ ہڑتال نئی بھرتیوں، کام کے آؤٹ سورسنگ نظام اور نیشنل پنشن سسٹم سے متعلق بعض پالیسی معاملات کے خلاف کی جا رہی ہے۔ دوسری جانب ریزرو بینک آف انڈیا کے تعطیلاتی کیلنڈر کے مطابق عیدالاضحیٰ (بقرعید) کے موقع پر 27 اور 28 مئی کو ملک کے مختلف علاقوں میں بینک بند رہیں گے۔
خاص طور پر جموں و کشمیر میں دونوں دن مکمل تعطیل رہے گی، جب کہ دیگر ریاستوں میں تعطیلات مقامی شیڈول کے مطابق مختلف دنوں میں ہو سکتی ہیں۔ بینکنگ ماہرین کا کہنا ہے کہ صارفین کو چاہیے کہ وہ چیک کلیئرنس، نقد رقم کے لین دین اور دیگر اہم معاملات وقت رہتے مکمل کرلیں تاکہ تعطیلات کے دوران دشواری سے بچا جا سکے۔