گوالپارہ اسکول تنازع: ٹفن میں گوشت پر پابندی، نیا حکم جاری
بیف تنازع کے بعد گوالپارہ کے سرکاری اسکولوں میں گوشت اور مچھلی لانے پر پابندی، صرف سبزی کھانے کی اجازت۔
بھارت کی ریاست آسام کے ضلع گوالپارہ میں ایک حالیہ تنازع کے بعد ضلع انتظامیہ نے تمام سرکاری اسکولوں کے لیے نئی ہدایات جاری کر دی ہیں۔ ان ہدایات کے مطابق اب طلبہ کو اسکولوں میں اپنے ٹفن کے ساتھ کسی بھی قسم کا گوشت یا مچھلی لانے کی اجازت نہیں ہوگی، جب کہ انڈے لانے اور کھانے کی اجازت برقرار رکھی گئی ہے۔یہ فیصلہ ایک ایسے واقعے کے بعد سامنے آیا جس نے علاقے میں خاصی توجہ حاصل کی۔ اطلاعات کے مطابق گزشتہ ہفتے ضلع کے کرشنائی علاقے کے ایک سرکاری اسکول میں چند طلبہ کے درمیان کھانے کو لے کر تنازع پیدا ہوگیا تھا۔ بعض والدین نے الزام عائد کیا کہ نویں جماعت کے چند طلبہ نے اپنے دو ہندو ہم جماعتوں کو بیف کھلانے کی کوشش کی، جس کے بعد معاملہ انتظامیہ اور پولیس تک پہنچ گیا۔
شکایت موصول ہونے کے بعد پولیس نے واقعے کی تحقیقات شروع کر دیں۔ حکام کے مطابق معاملے کی نوعیت کو دیکھتے ہوئے مجسٹریٹ سطح پر بھی جانچ کرائی جا رہی ہے تاکہ تمام حقائق سامنے آ سکیں۔ پولیس نے اس کیس سے متعلق ایک طالب علم کو حراست میں لیا جب کہ اس کی والدہ کو بھی گرفتار کیا گیا ہے۔ ان پر مذہبی جذبات کو ٹھیس پہنچانے سمیت مختلف دفعات کے تحت مقدمہ درج کیا گیا ہے۔واقعے کے بعد ضلع کے ڈپٹی کمشنر پردیپ تیمونگ اور سینئر سپرنٹنڈنٹ آف پولیس نبنیت مہنتا نے متعلقہ اسکول کا دورہ کیا اور حالات کا جائزہ لیا۔ بعد ازاں مختلف سماجی اور مقامی تنظیموں کے نمائندوں سے مشاورت کے بعد اسکولوں کے لیے نئی غذائی ہدایات مرتب کی گئیں۔
انتظامیہ کے جاری کردہ حکم نامے میں کہا گیا ہے کہ تمام سرکاری اسکولوں کے احاطے میں صرف سبزی خور کھانا ہی لانے اور کھانے کی اجازت ہوگی۔ مزید یہ کہ وقفۂ طعام یا دیگر اوقات میں کسی بھی طالب علم کو اسکول کی حدود سے باہر جانے کی اجازت نہیں ہوگی۔ حکام نے واضح کیا ہے کہ اگر کسی تعلیمی ادارے میں ان ہدایات کی خلاف ورزی پائی گئی تو متعلقہ افراد کے خلاف سخت کارروائی عمل میں لائی جائے گی۔ضلع انتظامیہ کا کہنا ہے کہ ان اقدامات کا مقصد تعلیمی اداروں میں نظم و ضبط برقرار رکھنا اور ایسے معاملات سے بچنا ہے جو طلبہ یا معاشرے کے مختلف طبقات کے درمیان اختلافات کا سبب بن سکتے ہیں۔
