ترنمول پر نیا وار، ہزار کروڑ کے مزید بینک کھاتے منجمد

ترنمول کانگریس کے مزید نو بینک کھاتے منجمد، مجموعی رقم ایک ہزار کروڑ سے زائد، معاملے پر ہائی کورٹ میں سماعت پیر کو ہوگی۔

مغربی بنگال میں ترنمول کانگریس کے بینک کھاتوں سے متعلق تنازع مزید گہرا ہوگیا ہے۔ ایک جانب کلکتہ ہائی کورٹ نے جماعت کو جزوی قانونی راحت فراہم کی، تو دوسری جانب سائبر کرائم پولیس نے پارٹی کے مزید بینک کھاتوں میں لین دین پر پابندی عائد کر دی، جس کے بعد معاملہ ایک نئی قانونی اور تفتیشی مرحلے میں داخل ہو گیا ہے۔گزشتہ روز کلکتہ ہائی کورٹ نے پولیس کی جانب سے منجمد کیے گئے ترنمول کانگریس کے تین بینک کھاتوں کو خصوصی افسر (اسپیشل آفیسر) کی نگرانی میں چلانے کی عبوری اجازت دی تھی۔ عدالت کے اس فیصلے کو ممتا بنرجی کی قیادت والے گروپ کے لیے وقتی ریلیف قرار دیا گیا، کیونکہ اس سے مخصوص شرائط کے تحت ان کھاتوں سے مالی معاملات انجام دینے کی راہ ہموار ہوئی۔لیکن جمعہ کو صورت حال اس وقت بدل گئی جب بیدھان نگر سائبر کرائم تھانے نے پارٹی کے مزید نو بینک کھاتوں میں لین دین پر پابندی لگا دی۔ ان کھاتوں کا تعلق مختلف سرکاری اور نجی بینکوں سے بتایا جا رہا ہے۔ اس تازہ کارروائی کے بعد منجمد کیے گئے پارٹی کے بینک کھاتوں کی مجموعی تعداد بارہ تک پہنچ گئی ہے۔
ادھر ترنمول کانگریس نے انفورسمنٹ ڈائریکٹوریٹ (ای ڈی) کی جانب سے تین بینک کھاتوں پر عائد پابندی کو کلکتہ ہائی کورٹ میں چیلنج کر دیا ہے۔ عدالت میں اس درخواست پر پیر کے روز سماعت متوقع ہے، جہاں فریقین اپنے اپنے دلائل پیش کریں گے۔مرکزی تحقیقاتی ایجنسی ای ڈی کے مطابق جن تین بینک کھاتوں پر اس نے پابندی عائد کی ہے، ان میں تقریباً 440.20 کروڑ روپے موجود ہیں۔ ابتدائی جانچ کے بعد جاری کیے گئے بیان میں ایجنسی نے اس رقم کی تصدیق کی تھی۔پولیس ذرائع کے مطابق بارہ منجمد کھاتوں میں مجموعی طور پر ایک ہزار کروڑ روپے سے زائد رقم جمع ہے۔ اگرچہ اس بارے میں کوئی باضابطہ سرکاری اعلان سامنے نہیں آیا، تاہم پولیس کے ایک ذمہ دار افسر اور ترنمول کانگریس کے ایک سینئر رہنما نے نام ظاہر نہ کرنے کی شرط پر اس دعوے کی تصدیق کی ہے۔
اس پورے معاملے کی بنیاد ترنمول کانگریس کے باغی رہنما رتبرت بنرجی گروپ سے وابستہ رکن اسمبلی وشوناتھ داس کی شکایت کو بتایا جا رہا ہے۔ انہوں نے پارٹی کے بعض بینک کھاتوں میں مشتبہ مالی لین دین کا شبہ ظاہر کرتے ہوئے بیدھان نگر سائبر کرائم تھانے میں شکایت درج کرائی تھی۔ اسی شکایت کے بعد پولیس نے تحقیقات کا آغاز کیا اور مرحلہ وار مختلف بینک کھاتوں کو منجمد کرنے کا فیصلہ کیا۔ذرائع کے مطابق سائبر کرائم پولیس نے اس کیس کے سلسلے میں شکایت کنندہ رکن اسمبلی سمیت رتبرت بنرجی گروپ کے سات اراکین اسمبلی کے بیانات بھی قلم بند کیے ہیں۔ تفتیشی حکام کا کہنا ہے کہ ابتدائی جانچ میں حاصل ہونے والی معلومات کی بنیاد پر مزید کھاتوں کی چھان بین کی جا رہی ہے، جب کہ مالی لین دین سے متعلق تمام پہلوؤں کا تفصیلی جائزہ لینے کے بعد آئندہ کارروائی کا فیصلہ کیا جائے گا۔