کیرالا کابینہ میں نئے وزراء کو محکموں کی تقسیم مکمل
کیرالا حکومت نے نئی کابینہ میں وزراء کے درمیان محکموں کی تقسیم کا اعلان کیا، اہم شعبے تفویض کیے گئے۔
کیرالا حکومت نے بدھ کے روز اپنی نئی کابینہ میں محکموں کی تقسیم کا باضابطہ اعلان کر دیا ہے، جس کے بعد ریاستی انتظامیہ کے اہم شعبوں کی ذمہ داریاں مختلف وزراء کے درمیان تقسیم ہو گئی ہیں۔ اس نئی تقسیم کا مقصد حکومتی امور کو زیادہ منظم، مؤثر اور تیز رفتار بنانا بتایا جا رہا ہے۔وزیراعلیٰ وی ڈی ستیشن نے اپنے پاس کئی انتہائی اہم اور اسٹریٹجک محکمے برقرار رکھے ہیں۔ ان کے ذمہ مالیات، کیرالہ فنانشل کارپوریشن، بندرگاہیں، قانون و انصاف، آلودگی کنٹرول، ہوائی اڈے، میٹرو ریل اور ریلوے سے متعلق امور ہوں گے۔ یہ تمام شعبے ریاست کی معاشی ترقی، بنیادی ڈھانچے اور قانونی انتظام کے لیے کلیدی حیثیت رکھتے ہیں۔
رمیس چنیتھلا کو داخلہ امور کے ساتھ ویجیلنس، فائر اینڈ ریسکیو سروسز، جیل خانہ جات اور کوئر (ناریل ریشہ صنعت) کے محکمے دیے گئے ہیں۔ ان کی ذمہ داریوں میں امن و امان برقرار رکھنا، احتسابی نظام کو مضبوط بنانا اور ہنگامی خدمات کو بہتر بنانا شامل ہوگا۔سنی جوزف کو بجلی، ماحولیات، پارلیمانی امور اور اے این ای آر ٹی جیسے اہم محکموں کی ذمہ داری سونپی گئی ہے۔ ان کے زیر انتظام توانائی کی پالیسی، ماحول دوست منصوبے اور ایوانی امور کی نگرانی جیسے معاملات آئیں گے۔
کے موریلی دھرن کو صحت، طبی تعلیم، میڈیکل یونیورسٹی، آیوش، ادویات کی نگرانی اور دیواسوم (مندر انتظامیہ) کے محکمے دیے گئے ہیں۔ یہ ذمہ داریاں عوامی صحت کے نظام اور مذہبی اداروں کی انتظامیہ دونوں کے لیے اہم تصور کی جاتی ہیں۔اے پی انیل کمار کو زمین و محصولات، سروے اور لینڈ ریکارڈز، اور لینڈ ریفارمز کے محکمے تفویض کیے گئے ہیں، جو زمین سے متعلق پالیسی سازی اور اصلاحات میں مرکزی کردار ادا کرتے ہیں۔پی سی وشنوناتھ کو سیاحت، ثقافت اور کیرالہ اسٹیٹ فلم ڈیولپمنٹ کارپوریشن کا قلمدان ملا ہے، جس کا مقصد ریاست کی سیاحتی صنعت اور ثقافتی سرگرمیوں کو فروغ دینا ہے۔ایم لیجو کو کوآپریٹو اور ایکسائز کے محکمے دیے گئے ہیں۔ جب کہ روزی ایم جان کو کالجیٹ اور ٹیکنیکل ایجوکیشن، مختلف یونیورسٹیوں (زرعی، ویٹرنری، فشریز، میڈیکل اور ڈیجیٹل یونیورسٹی کے علاوہ)، داخلہ امتحانات، این سی سی اور اسکل ڈیولپمنٹ پروگرامز کی ذمہ داری دی گئی ہے۔
