راجستھان میں پیرا میڈیکل امتحان سے قبل مبینہ نقل کی سازش بے نقاب

راجستھان میں پیرا میڈیکل امتحان سے قبل مبینہ نقل کی سازش بے نقاب ہوئی، چار افراد گرفتار کر لیے گئے جبکہ امتحانی مرکز بھی منسوخ کر دیا گیا۔

راجستھان میں پیرا میڈیکل امتحانات کے آغاز سے پہلے ایک نجی کالج میں مبینہ طور پر نقل کرانے کی منصوبہ بندی سامنے آنے کے بعد پولیس نے کارروائی کرتے ہوئے چار افراد کو گرفتار کر لیا۔ اس واقعے کے بعد متعلقہ امتحانی مرکز بھی منسوخ کر دیا گیا ہے، جب کہ معاملے کی مزید تفتیش جاری ہے۔پولیس کے مطابق یہ معاملہ جے پور کے پربھا دیوی میموریل پی جی کالج سے متعلق ہے، جہاں راجستھان یونیورسٹی آف ہیلتھ سائنسز کے تحت 29 جون سے 3 جولائی تک پیرا میڈیکل کے امتحانات منعقد ہونا تھے۔ اطلاع ملنے پر پولیس نے فوری طور پر خصوصی ٹیم تشکیل دی اور تحقیقات کا آغاز کیا۔
تحقیقات کے دوران پولیس نے دو ملزمان کے قبضے سے ایک ڈائری برآمد کی، جس میں متعدد طلبہ کے نام، مبینہ طور پر وصول کی گئی رقوم اور دیگر تفصیلات درج تھیں۔ اس کے علاوہ موبائل فونز سے ایسی چیٹس اور معلومات بھی ملی ہیں جن میں امتحانی مرکز کا مقام اور دیگر متعلقہ معلومات شیئر کیے جانے کا ذکر سامنے آیا۔ پولیس نے شواہد اپنے قبضے میں لے کر مقدمہ درج کر لیا۔گرفتار ہونے والوں میں کالج کے بانی دیو کرشن منڈیوال اور رام کرشن منڈیوال کے علاوہ ضلع جھنجھنو کے مکند گڑھ میں واقع ایس کرن کالج کے پیرا میڈیکل شعبے کے لیکچرر شنکر لال جاٹ اور شعبہ کے سربراہ کرشن کمار سینی بھی شامل ہیں۔
پولیس حکام کا کہنا ہے کہ ایس کرن کالج کے تقریباً 45 طلبہ کا امتحانی مرکز پربھا دیوی میموریل کالج میں بنایا گیا تھا۔ ابتدائی تحقیقات کے مطابق یہ شبہ ظاہر کیا جا رہا ہے کہ ان طلبہ کو امتحان میں کامیاب کرانے کے لیے مبینہ طور پر نقل کا انتظام کرنے کے بدلے بھاری رقم وصول کی گئی تھی۔حکام کے مطابق پولیس نے بروقت کارروائی کرتے ہوئے امتحان شروع ہونے سے پہلے ہی تمام ملزمان کو گرفتار کر لیا، جس کے باعث مبینہ منصوبہ عملی شکل اختیار نہ کر سکا۔ گرفتار افراد کو عدالت سے ریمانڈ پر حاصل کر کے مزید پوچھ گچھ کی جا رہی ہے تاکہ اس معاملے میں ملوث دیگر افراد اور ممکنہ نیٹ ورک کا بھی سراغ لگایا جا سکے۔
اس واقعے کی خبر منظر عام پر آنے کے بعد کالج کے باہر ہنگامہ آرائی بھی دیکھنے میں آئی، جس کی ویڈیوز سوشل میڈیا پر گردش کرتی رہیں۔ معاملے کی سنگینی کو دیکھتے ہوئے راجستھان یونیورسٹی آف ہیلتھ سائنسز نے فوری فیصلہ کرتے ہوئے پربھا دیوی میموریل پی جی کالج کا امتحانی مرکز منسوخ کر دیا ہے۔ یونیورسٹی اور پولیس دونوں کا کہنا ہے کہ تحقیقات مکمل ہونے کے بعد مزید قانونی کارروائی عمل میں لائی جائے گی۔