شتروگھن سنہا نے سونم وانگچک کے لیے فوری مداخلت کا مطالبہ

سونم وانگچک کی طویل بھوک ہڑتال پر شتروگھن سنہا نے حکومت سے فوری مداخلت اور ان کے مطالبات پر غور کی اپیل کی۔

ترنمول کانگریس (ٹی ایم سی) کے رکنِ پارلیمان شتروگھن سنہا نے معروف ماحولیاتی کارکن اور تعلیمی اصلاحات کے حامی سونم وانگچک کی صحت پر تشویش کا اظہار کرتے ہوئے مرکزی حکومت سے فوری مداخلت کی اپیل کی ہے۔ انہوں نے سوشل میڈیا پلیٹ فارم ایکس پر جاری اپنے بیان میں کہا کہ سونم وانگچک اس وقت نئی دہلی کے جنتر منتر پر پُرامن احتجاج کے طور پر بھوک ہڑتال کر رہے ہیں۔شتروگھن سنہا کے مطابق سونم وانگچک کا احتجاج ملک کے نوجوانوں، خصوصاً نئی نسل کے مسائل کی نمائندگی کرتا ہے۔ انہوں نے کہا کہ وانگچک نیٹ (این ای ای ٹی) یو جی امتحان کے پرچہ لیک ہونے کے معاملے اور تعلیمی نظام میں شفافیت کے مطالبے کے حق میں اپنی آواز بلند کر رہے ہیں۔ ان کا کہنا تھا کہ یہ احتجاج کسی سیاسی مقصد کے لیے نہیں بلکہ نوجوانوں کے مستقبل سے جڑے اہم سوالات کو اجاگر کرنے کے لیے کیا جا رہا ہے۔
رکنِ پارلیمان نے اپنے پیغام میں بتایا کہ سونم وانگچک کی بھوک ہڑتال کو تقریباً تین ہفتے گزر چکے ہیں، جس کے باعث ان کی جسمانی حالت تشویشناک حد تک متاثر ہونے کی اطلاعات سامنے آ رہی ہیں۔ انہوں نے کہا کہ طویل عرصے تک غذا سے دور رہنے کے باعث ان کی صحت مسلسل کمزور ہو رہی ہے، جس پر ان کے حامیوں اور سماجی حلقوں میں بے چینی پائی جا رہی ہے۔انہوں نے مزید کہا کہ گزشتہ چند روز کے دوران مختلف سیاسی جماعتوں کے رہنماؤں، سماجی کارکنوں، فنکاروں، ڈیجیٹل کریئیٹرز اور بیرونِ ملک مقیم افراد نے بھی سونم وانگچک کے حق میں آواز بلند کی ہے۔ شتروگھن سنہا کے مطابق اس معاملے پر عوامی حمایت میں مسلسل اضافہ ہو رہا ہے اور لوگ حکومت سے مطالبہ کر رہے ہیں کہ اس احتجاج کو سنجیدگی سے لیا جائے۔
اپنے بیان کے اختتام پر شتروگھن سنہا نے وزیر اعظم نریندر مودی، وزیر اعظم کے دفتر اور متعلقہ حکام سے اپیل کی کہ وہ فوری طور پر اس معاملے کا نوٹس لیں، سونم وانگچک کی صحت کو مدنظر رکھتے ہوئے ان کے مطالبات پر غور کریں اور بات چیت کے ذریعے مسئلے کا قابلِ قبول حل تلاش کریں۔انہوں نے یہ بھی بتایا کہ ان کی صاحبزادی اور بالی ووڈ اداکارہ سوناکشی سنہا نے بھی حال ہی میں سوشل میڈیا پر سونم وانگچک کے حق میں اپنی رائے کا اظہار کیا، جس پر انہوں نے فخر کا اظہار کرتے ہوئے کہا کہ نوجوان نسل کا ایسے اہم عوامی معاملات پر آواز اٹھانا حوصلہ افزا امر ہے۔