نوجوانوں کے مستقبل پر سمجھوتہ نہیں، راہل گاندھی

کانگریس رہنما راہل گاندھی نے نیٹ یو جی کے دوبارہ امتحان سے قبل طلبہ کو نیک خواہشات اور شفافیت کی اپیل کی۔

کانگریس کے رکنِ پارلیمان اور لوک سبھا میں قائدِ حزبِ اختلاف راہل گاندھی نے نیٹ یو جی 2026 کے دوبارہ منعقد ہونے والے امتحان سے قبل طلبہ کے لیے نیک تمناؤں کا اظہار کیا ہے۔ انہوں نے ایک ویڈیو پیغام کے ذریعے امیدواروں کو حوصلہ دیتے ہوئے کہا کہ وہ پورے اعتماد اور یکسوئی کے ساتھ امتحان میں شریک ہوں اور اپنی صلاحیتوں پر بھروسہ رکھیں۔راہل گاندھی نے اپنے پیغام میں کہا کہ ملک بھر کے لاکھوں طلبہ گزشتہ چند ہفتوں سے غیر یقینی صورتحال اور ذہنی دباؤ کا سامنا کر رہے ہیں، اس لیے ضروری ہے کہ وہ خود پر اعتماد برقرار رکھیں۔ انہوں نے طلبہ کو یقین دلایا کہ ان کے حقوق اور مستقبل کے تحفظ کے لیے وہ ہمیشہ آواز اٹھاتے رہیں گے۔
انہوں نے اس امید کا اظہار بھی کیا کہ اس بار امتحانی عمل مکمل طور پر شفاف، منصفانہ اور منظم انداز میں انجام پائے گا اور کسی قسم کی بے ضابطگی یا تنازع سامنے نہیں آئے گا۔ راہل گاندھی نے مرکزی حکومت اور متعلقہ اداروں سے مطالبہ کیا کہ وہ امتحان کے انعقاد کے دوران تمام ضروری احتیاطی تدابیر اختیار کریں تاکہ امیدواروں کو دوبارہ کسی مشکل یا پریشانی کا سامنا نہ کرنا پڑے۔اپنے ویڈیو بیان میں انہوں نے کہا کہ طلبہ پہلے ہی کافی ذہنی دباؤ اور اضطراب سے گزر چکے ہیں، لہٰذا اس بار انتظامیہ کی ذمہ داری ہے کہ امتحان کے پورے عمل کو شفاف اور قابلِ اعتماد بنایا جائے۔ ان کے مطابق نوجوانوں کے مستقبل سے جڑے ایسے اہم امتحانات میں کسی قسم کی لاپروائی کی گنجائش نہیں ہونی چاہیے۔
واضح رہے کہ نیٹ (یو جی) 2026 کا امتحان 3 مئی کو نیشنل ٹیسٹنگ ایجنسی (این ٹی اے) کی نگرانی میں منعقد ہوا تھا۔ لیکن امتحان کے سوالیہ پرچے کے مبینہ طور پر لیک ہونے کے الزامات سامنے آنے کے بعد متعلقہ حکام نے امتحان کو منسوخ کرنے کا فیصلہ کیا۔ بعد ازاں اعلان کیا گیا کہ یہ امتحان 21 جون کو دوبارہ لیا جائے گا، جس کے لیے ملک بھر کے امیدوار ایک بار پھر تیاریوں میں مصروف ہیں۔