مہاراشٹر میں مندر کی چھت گرنے سے پانچ افراد جاں بحق

مہاراشٹر کے پر بھنی میں زیر تعمیر ہنومان مندر کی چھت گرنے سے پانچ افراد جاں بحق، 16 زخمی ہوئے، امداد کا اعلان۔

مہاراشٹر کے ضلع پر بھگنی میں ہفتے کے روز ایک افسوسناک حادثہ پیش آیا، جہاں زیر تعمیر ہنومان مندر کے ایک حصے کی چھت اچانک گرنے کے نتیجے میں کم از کم پانچ افراد کی موت ہو گئی، جبکہ 16 دیگر افراد زخمی ہو گئے۔یہ حادثہ ضلع پر بھگنی کے یشواڑی گاؤں میں واقع ہنومان مندر کے تعمیراتی مقام پر پیش آیا۔ ابتدائی معلومات کے مطابق مندر کے بیرونی حصے میں بنائے جانے والے ’’سبھا منڈپ‘‘ یعنی اجتماع ہال کی چھت کا ایک حصہ اچانک منہدم ہو گیا، جس کے باعث وہاں موجود افراد ملبے تلے دب گئے۔
پولیس حکام کے مطابق حادثہ ہفتے کی دوپہر تقریباً ساڑھے تین بجے پیش آیا۔ واقعے کے فوراً بعد مقامی افراد اور امدادی ٹیموں نے موقع پر پہنچ کر ملبہ ہٹانے کا کام شروع کیا اور متاثرہ افراد کو قریبی اسپتال منتقل کیا گیا۔ حکام کے مطابق زخمیوں میں بعض افراد کی حالت تشویشناک بھی بتائی جا رہی ہے۔حادثے کی اطلاع ملتے ہی انتظامیہ کے اعلیٰ افسران بھی جائے وقوعہ پر پہنچے اور امدادی کارروائیوں کا جائزہ لیا۔ واقعے کے بعد علاقے میں غم و افسوس کی لہر پھیل گئی ہے، جبکہ حادثے کی وجوہات جاننے کے لیے تحقیقات بھی شروع کر دی گئی ہیں۔
بھارت کے وزیراعظم نریندر مودی اور مہاراشٹر کے وزیراعلیٰ دیویندر فڑنویس نے اس حادثے پر افسوس کا اظہار کیا ہے۔ دونوں رہنماؤں نے جاں بحق افراد کے اہل خانہ سے تعزیت کی اور زخمیوں کی جلد صحت یابی کے لیے دعا کی۔وزیراعلیٰ دیویندر فڑنویس نے حادثے میں جان گنوانے والے افراد کے لواحقین کے لیے مالی امداد کا اعلان بھی کیا ہے۔ انہوں نے کہا کہ ہر متوفی کے خاندان کو پانچ لاکھ روپے کی امدادی رقم فراہم کی جائے گی۔حکام کا کہنا ہے کہ تعمیراتی کام کے دوران حفاظتی انتظامات کی جانچ کی جائے گی تاکہ مستقبل میں اس طرح کے حادثات سے بچا جا سکے۔