اکھلیش یادو نے یوپی کابینہ توسیع پر حکومت کو تنقید بنایا

اکھلیش یادو نے یوپی کابینہ توسیع پر سوال اٹھاتے ہوئے حکومت کی کارکردگی اور وزراء کی تبدیلی کو تنقید بنایا۔

اتر پردیش میں ممکنہ کابینہ توسیع کی خبروں کے درمیان سماجوادی پارٹی کے سربراہ اور سابق وزیرِ اعلیٰ اکھلیش یادو نے ریاستی حکومت کو سخت تنقید کا نشانہ بنایا ہے۔ انہوں نے کہا کہ اگر حکومت نو برس کے دوران عوامی مسائل حل نہیں کر سکی تو اب آخری چند مہینوں میں وزراء کی تبدیلی سے کیا فرق پڑے گا۔اکھلیش یادو نے سوشل میڈیا پلیٹ فارم ایکس پر جاری اپنے بیان میں کہا کہ اتر پردیش کابینہ میں صرف چند نشستیں خالی ہیں، جب کہ دوسری جماعتوں سے شامل ہونے والے رہنماؤں کی تعداد اس سے کہیں زیادہ ہے۔ انہوں نے طنزیہ انداز میں سوال اٹھایا کہ آیا حکومت ان سبھی کو وزارت دینا چاہتی ہے یا پھر صرف اُن افراد کو منتخب کیا جائے گا جو سیاسی طور پر کمزور سمجھے جاتے ہیں۔
انہوں نے موجودہ وزراء کی کارکردگی پر بھی سوال اٹھاتے ہوئے کہا کہ اگر ان سے محکمے واپس لیے جاتے ہیں یا ان کے اختیارات کم کیے جاتے ہیں تو اس سے عوام میں یہی پیغام جائے گا کہ وہ اپنی ذمے داریاں بہتر انداز میں ادا نہیں کر سکے۔ اکھلیش یادو کے مطابق ایسی صورت حال میں کئی وزراء انتخابی میدان میں اترنے سے پہلے ہی سیاسی نقصان اٹھا سکتے ہیں۔سابق وزیرِ اعلیٰ نے ایک اور پوسٹ میں کہا کہ اطلاعات مل رہی ہیں کہ ریاست میں کابینہ کی توسیع ہونے والی ہے، تاہم انہوں نے اسے وزیرِ اعلیٰ کی طاقت میں کمی سے تعبیر کیا۔ انہوں نے یہ بھی کہا کہ کابینہ میں تبدیلی سے قبل اُن وزراء سے بھی رائے لینی چاہیے جو پہلے سے حکومت کا حصہ ہیں۔
اکھلیش یادو نے مطالبہ کیا کہ کابینہ میں خواتین کو مناسب نمائندگی دی جائے اور نئی تقرریوں میں خواتین کے لیے ریزرویشن کا خیال رکھا جائے۔ ان کے مطابق خواتین کی سیاسی شمولیت ریاستی سیاست کو مزید مضبوط بنا سکتی ہے۔دوسری جانب سیاسی حلقوں میں یہ قیاس آرائیاں جاری ہیں کہ اتر پردیش میں جلد کابینہ توسیع ہو سکتی ہے۔ وزیرِ اعلیٰ یوگی آدتیہ ناتھ نے ہفتے کے روز لکھنؤ میں گورنر آنندی بین پٹیل سے ملاقات کی تھی، جس کے بعد کابینہ میں رد و بدل کی چہ مگوئیاں مزید تیز ہو گئی ہیں۔
سیاسی مبصرین کا کہنا ہے کہ آئندہ انتخابات سے قبل کابینہ میں تبدیلی حکومت کی حکمتِ عملی کا حصہ ہو سکتی ہے تاکہ مختلف سماجی اور سیاسی طبقات کو ساتھ رکھا جا سکے۔ تاہم اپوزیشن اس اقدام کو حکومت کی کمزوری قرار دے رہی ہے اور اسے سیاسی دباؤ کا نتیجہ بتا رہی ہے۔