ادھو ٹھاکرے کو بڑا جھٹکا، چھ ارکانِ پارلیمنٹ باغی
ادھو ٹھاکرے کی شیوسینا میں بغاوت، چھ ارکانِ پارلیمنٹ اجلاس سے غیر حاضر، وائی پلس سیکیورٹی ملی، شندے دھڑے میں شمولیت کی قیاس آرائیاں۔
مہاراشٹر کی سیاست میں ایک نئی ہلچل اس وقت پیدا ہوگئی جب ریاستی حکومت نے شیوسینا (ادھو بالا صاحب ٹھاکرے) کے چھ ارکانِ پارلیمنٹ کو وائی پلس سیکیورٹی فراہم کر دی۔ یہ پیش رفت ایسے وقت میں سامنے آئی ہے جب پارٹی کے اندر اختلافات اور ممکنہ سیاسی ٹوٹ پھوٹ کی خبریں زور پکڑ رہی ہیں۔جمعرات کے روز شیوسینا (یو بی ٹی) نے دہلی میں پارلیمنٹ ہاؤس کے اندر واقع اپنے پارٹی دفتر میں پارلیمانی پارٹی کا اجلاس طلب کیا تھا۔ تاہم پارٹی کے نو ارکانِ پارلیمنٹ میں سے صرف تین اراکین اجلاس میں شریک ہوئے، جبکہ چھ اراکین نے شرکت نہیں کی۔
جن ارکان کو اضافی سیکیورٹی دی گئی ہے ان میں سنجے دیشمکھ، سنجے جادھو، سنجے دینا پاٹل، ناگیش پاٹل اشٹیکر، اوم راجے نمبالکر اور بھاؤ صاحب واگھچورے شامل ہیں۔ سیاسی حلقوں میں یہ قیاس آرائیاں جاری ہیں کہ یہ اراکین ایکناتھ شندے کی قیادت والی شیوسینا کا حصہ بن سکتے ہیں یا پھر الگ گروپ تشکیل دے کر شندے دھڑے کی حمایت کا اعلان کر سکتے ہیں۔پارٹی کے سینئر رہنما اور رکنِ پارلیمنٹ سنجے راوت نے اجلاس کے بعد میڈیا سے گفتگو کرتے ہوئے کہا کہ پارلیمانی پارٹی کی میٹنگ میں صرف راجابھاؤ واجے، اروِند ساونت اور انیل دیسائی شریک ہوئے۔ ان کے مطابق جو اراکین اجلاس میں نہیں آئے، انہیں وجہ بتاؤ نوٹس جاری کر دیا گیا ہے۔
سنجے راوت کا کہنا تھا کہ غیر حاضر رہنے والے ارکان کو سات دن کے اندر اپنا جواب جمع کرانے کی ہدایت دی گئی ہے۔ انہوں نے کہا کہ پارٹی نے باضابطہ کارروائی کا آغاز کر دیا ہے اور ان ارکان کو نااہل قرار دلوانے کی کوشش کی جائے گی۔ ان کے مطابق اگر لوک سبھا اسپیکر قانون اور ضابطوں کے مطابق فیصلہ کرتے ہیں تو ان ارکان کے خلاف کارروائی ممکن ہے۔انہوں نے مزید کہا کہ پارٹی اس معاملے پر پارلیمنٹ، عدالت اور عوامی سطح پر اپنی جدوجہد جاری رکھے گی۔ سنجے راوت نے تنقید کرتے ہوئے کہا کہ جن ارکان پر وفاداری تبدیل کرنے کے الزامات لگ رہے ہیں، ان کی سیکیورٹی میں اضافہ کیا گیا ہے، تاہم اس سے سیاسی جدوجہد متاثر نہیں ہوگی۔
ادھر مہاراشٹر کی سیاسی فضا میں یہ سوال زیرِ بحث ہے کہ آیا شیوسینا (یو بی ٹی) اپنے ارکان کو متحد رکھنے میں کامیاب ہوگی یا آنے والے دنوں میں ایک اور بڑی سیاسی صف بندی دیکھنے کو ملے گی۔
