اکھلیش یادو اور ممتا بنرجی کی ملاقات، انتخابی شفافیت پر سوالات

اکھلیش یادو نے کولکاتا میں ممتا بنرجی سے ملاقات کے بعد انتخابات میں مبینہ دھاندلی اور بے ضابطگیوں پر شدید سوالات اٹھائے۔

سماج وادی پارٹی کے سربراہ اور اتر پردیش کے سابق وزیر اعلیٰ اکھلیش یادوجمعرات کے روز کولکاتا پہنچے، جہاں انہوں نے مغربی بنگال کی وزیر اعلیٰ ممتا بنرجی سے ملاقات کی۔ اس ملاقات کے بعد دونوں رہنماؤں کی سیاسی گفتگو نے ایک بار پھر ملک میں انتخابی شفافیت اور جمہوری عمل پر سوالات کو موضوعِ بحث بنا دیا۔میڈیا سے گفتگو کرتے ہوئے اکھلیش یادو نے کہا کہ انہیں وہ وقت اچھی طرح یاد ہے جب مغربی بنگال میں غیر جانبدارانہ انتخابات ہوئے تھے اور ممتا بنرجی اقتدار میں آئیں۔ ان کا کہنا تھا کہ آج تمام اپوزیشن جماعتوں کو متحد ہوکر اُن مبینہ بے ضابطگیوں کے خلاف آواز اٹھانی چاہیے جو حالیہ انتخابات میں دیکھنے کو ملیں۔
انہوں نے الزام عائد کیا کہ موجودہ انتخابی عمل میں کئی سطحوں پر دھاندلی اور غیر شفاف طریقے اختیار کیے گئے۔ اکھلیش یادو کے مطابق اس طرح کی صورت حال کا ماضی میں تصور بھی نہیں کیا جا سکتا تھا۔ انہوں نے بھارتیہ جنتا پارٹی، الیکشن کمیشن اور بعض دیگر اداروں پر تنقید کرتے ہوئے کہا کہ انتخابات کے دوران طاقت اور اثر و رسوخ کا استعمال کیا گیا، جس سے جمہوری اقدار متاثر ہوئیں۔ایس پی سربراہ نے مزید کہا کہ پہلے یہ کہا جاتا تھا کہ بنگال آج جو راستہ اختیار کرتا ہے، پورا ملک کل وہی راستہ اپناتا ہے، لیکن اب صورت حال مختلف دکھائی دے رہی ہے۔ ان کے مطابق اتر پردیش میں جو سیاسی حکمتِ عملی آزمائی گئی، وہ بعد میں دیگر ریاستوں کے انتخابات میں بھی دہرائی گئی۔ انہوں نے دعویٰ کیا کہ اس طرزِ عمل نے انتخابی نظام پر عوامی اعتماد کو نقصان پہنچایا ہے۔
واضح رہے کہ مغربی بنگال اسمبلی انتخابات کے نتائج 4 مئی کو سامنے آئے تھے، جن میں ترنمول کانگریس کو توقعات کے برخلاف کم نشستیں حاصل ہوئیں۔ انتخابی نتائج کے بعد ریاست کی سیاست میں ہلچل دیکھی جا رہی ہے اور مختلف اپوزیشن جماعتیں انتخابی عمل پر سوالات اٹھا رہی ہیں۔ سیاسی مبصرین کے مطابق آنے والے دنوں میں اپوزیشن جماعتوں کے درمیان اتحاد اور مشترکہ حکمتِ عملی پر مزید بات چیت کا امکان ہے۔