ایرانی وزیر خارجہ عباس عراقچی روس پہنچ گئے مذاکرات جاری

عباس عراقچی روس میں جنگی صورتحال، پاکستان کی ثالثی اور آئندہ مذاکرات پر بات چیت کر رہے ہیں.

ایران کے وزیرِ خارجہ عباس عراقچی روس پہنچ چکے ہیں، جہاں انہوں نے اپنے روسی ہم منصبوں کے ساتھ اہم ملاقاتوں کا آغاز کیا ہے۔ روس کے شہر سینٹ پیٹرزبرگ میں گفتگو کرتے ہوئے انہوں نے کہا کہ ایران اور روس کے درمیان مسلسل رابطے جاری رہے ہیں، تاہم جنگی حالات کے باعث کچھ عرصے سے براہِ راست ملاقاتیں ممکن نہیں ہو سکیں۔عباس عراقچی نے اپنے بیان میں کہا کہ “ہم اپنے روسی دوستوں کے ساتھ موجودہ جنگی صورتحال اور خطے میں پیدا ہونے والی تازہ پیش رفت پر تفصیلی بات چیت کریں گے۔ اس کے ساتھ ساتھ ہم حالیہ حالات کا جائزہ بھی لیں گے۔ یہ ایک فطری عمل ہے کہ ہم باہمی تعاون اور ضروری ہم آہنگی کو مزید مضبوط بنائیں تاکہ مشترکہ چیلنجز کا مؤثر انداز میں مقابلہ کیا جا سکے۔”
انہوں نے مزید کہا کہ خطے کی بدلتی ہوئی صورتحال کے پیشِ نظر ایران اور روس کے درمیان قریبی رابطہ انتہائی ضروری ہے، کیونکہ دونوں ممالک کئی اہم علاقائی اور بین الاقوامی معاملات میں ایک دوسرے کے ساتھ تعاون کرتے ہیں۔اپنی گفتگو کے دوران انہوں نے پاکستان کا خصوصی طور پر ذکر کیا اور کہا کہ “پاکستان نے ایران اور امریکہ کے درمیان ہونے والی بات چیت میں ایک اہم ثالثی کردار ادا کیا ہے۔ ہم نے پاکستان میں اپنے دوستوں کے ساتھ مفید اور مثبت ملاقاتیں کیں، اور خدا کا شکر ہے کہ یہ دورہ نہایت کامیاب رہا۔”
انہوں نے اس بات پر بھی زور دیا کہ اب تک ہونے والی پیش رفت کا بغور جائزہ لیا گیا ہے اور اس بات پر تبادلۂ خیال جاری ہے کہ آئندہ مذاکرات کس انداز میں اور کن شرائط کے تحت آگے بڑھائے جا سکتے ہیں۔واضح رہے کہ روس پہنچنے سے قبل عباس عراقچی پاکستان اور عمان کا دورہ بھی کر چکے ہیں، جہاں انہوں نے مشرقِ وسطیٰ کی موجودہ صورتحال اور خطے میں استحکام کے حوالے سے مختلف رہنماؤں کے ساتھ اہم ملاقاتیں کیں۔ ان دوروں کو خطے میں سفارتی سرگرمیوں کے تسلسل کے طور پر دیکھا جا رہا ہے، جس کا مقصد کشیدگی میں کمی اور مذاکراتی عمل کو فروغ دینا ہے۔