بنگال کی خلیج میں بگڑتا موسم، اندمان نکوبار میں بارش الرٹ
بنگال کی خلیج اندمان نکوبار میں بھاری بارش، تیز ہوائیں، گرج چمک اور سمندری صورتحال خراب ہونے کا امکان۔
موسمی ماہرین نے خبردار کیا ہے کہ بنگال کی خلیج میں بننے والی ایک نئی موسمی گڑبڑ کے سبب آئندہ دنوں میں اندمان اور نکوبار جزائر میں بارشوں میں نمایاں اضافہ ہوسکتا ہے۔ محکمۂ موسمیات کے مطابق جزائر کے مختلف علاقوں میں ایسی علامتیں دیکھی جا رہی ہیں جو عام طور پر کسی کم دباؤ کے نظام کے شدت اختیار کرنے سے پہلے سامنے آتی ہیں۔ اس صورتحال کے پیشِ نظر حکام نے احتیاطی ہدایات جاری کی ہیں اور لوگوں کو موسم کی تازہ ترین اپڈیٹس پر نظر رکھنے کا مشورہ دیا ہے۔ماہرین کے مطابق سمندر کے اوپر کسی مقام پر جب فضائی دباؤ اطراف کے مقابلے میں کم ہوجاتا ہے تو وہاں ہوا کی تیز گردش شروع ہوتی ہے۔ یہی عمل بعد میں گہرے بادلوں، مسلسل بارش اور کبھی کبھار چکراتی ہواؤں کو جنم دیتا ہے۔ اگرچہ یہ کیفیت ہر مرتبہ طوفان میں تبدیل نہیں ہوتی، لیکن اس کے دوران ہونے والی موسمی سرگرمیاں معمول کے موسم سے کہیں زیادہ شدید ہوسکتی ہیں۔
اطلاعات کے مطابق موسمی صورتحال 21 نومبر سے مزید بگڑنے کا امکان ہے۔ سرکاری ذرائع نے بتایا ہے کہ کم دباؤ کا موجودہ دائرہ بتدریج شدت پکڑ سکتا ہے، جس کے نتیجے میں بعض علاقوں میں بارشوں کی رفتار اور ہواؤں کی تیزی میں اضافہ ہونے کی توقع ہے۔ محکمۂ موسمیات نے پیش گوئی کی ہے کہ نکوبار جزائر میں چند مقامات پر بھاری سے بہت بھاری بارش ہوسکتی ہے جس کی مقدار 7 سے 20 سینٹی میٹر تک پہنچ سکتی ہے، جب کہ اندمان میں بھی 7 سے 11 سینٹی میٹر تک بارش کی اچھی خاصی امکان ظاہر کیا گیا ہے۔محکمہ مزید کہتا ہے کہ 24 اور 25 نومبر کو جزائر کے کچھ علاقوں میں گرج چمک کے ساتھ تیز ہوائیں چلنے کا اندیشہ ہے، جن کی رفتار 40 سے 50 کلو میٹر فی گھنٹہ تک ریکارڈ کی جا سکتی ہے۔ اس دوران بجلی گرنے کے واقعات کا بھی خطرہ موجود رہے گا، لہٰذا شہریوں کو محتاط رہنے اور غیر ضروری سفر سے گریز کا مشورہ دیا گیا ہے۔
دوسری جانب اندمان ساغر میں سطح سمندر کے قریب چلنے والی ہواؤں کی رفتار 35 سے 45 کلو میٹر فی گھنٹہ تک پہنچنے کا امکان ہے، جبکہ جھکڑوں کی صورت میں یہ رفتار مزید بڑھ کر 55 کلو میٹر فی گھنٹہ تک جا سکتی ہے۔ ایسی صورتحال بحری سرگرمیوں اور ماہی گیری کے لیے خطرناک ثابت ہوسکتی ہے۔ اسی لیے متعلقہ محکموں نے ماہی گیروں کو تنبیہ کی ہے کہ وہ اگلے چند روز تک سمندر میں جانے سے اجتناب کریں۔محکمہ موسمیات مسلسل صورتحال پر نظر رکھے ہوئے ہے اور کہا ہے کہ اگر دباؤ کا یہ سلسلہ مزید گہرا ہوا تو اضافی وارننگز بھی جاری کی جائیں گی۔ فی الحال مقامی انتظامیہ نے لوگوں کو مشورہ دیا ہے کہ وہ پختہ عمارتوں میں رہیں، ساحلی علاقوں میں غیرضروری قیام سے بچیں اور تیز ہواؤں کے دوران بجلی کے کھمبوں یا کمزور درختوں کے پاس جانے سے احتراز کریں۔
