بہار انتخابات میں سیاسی جوش، الزامات، بدامنی اور عوامی جوش و خروش

بہار انتخابات میں رہنماؤں کے حملے، الزامات، تکنیکی رکاوٹیں اور عوامی جوش برقرار، این ڈی اے اور اپوزیشن میں زبردست مقابلہ۔

بہار میں انتخابی مہم اپنے عروج پر ہے اور مختلف جماعتوں کے رہنماؤں کے درمیان زبردست لفظی جنگ جاری ہے۔ رکسول میں ایک ریلی کے دوران اتر پردیش کے وزیر اعلیٰ یوگی آدتیہ ناتھ نے حزبِ اختلاف پر سخت حملہ کرتے ہوئے کہا کہ نوجوانوں کو بہکنے کی ضرورت نہیں ہے۔ ان کے مطابق جن لوگوں نے ماضی میں عوام کی زمینیں ہتھیالیں، وہ آج روزگار دینے کی بات کر رہے ہیں۔ یوگی نے راشٹریہ جنتا دل (آر جے ڈی) کے دورِ حکومت کو “ڈاکیتی اور بدعنوانی کا زمانہ” قرار دیا۔دوسری طرف جموئی میں مرکزی وزیر داخلہ امیت شاہ نے ایک ریلی سے خطاب کرتے ہوئے کہا کہ این ڈی اے کے خلاف بننے والا اتحاد “بکھرا ہوا” ہے۔ ان کے بقول، اگر ایسے لوگ کامیاب ہو گئے تو ریاست میں دوبارہ تشدد اور بدامنی کا ماحول لوٹ آئے گا۔
اسی دوران لوک جن شکتی پارٹی (رام ولاس) کے سربراہ اور مرکزی وزیر چراغ پاسوان کو فضائی سفر میں مشکلات کا سامنا کرنا پڑا۔ ایئر ٹریفک کنٹرول میں تکنیکی خرابی کے باعث وہ تقریباً 45 منٹ تک ہیلی کاپٹر میں بیٹھے رہے، مگر پرواز کی اجازت نہیں ملی۔ ذرائع کے مطابق، انہوں نے اس صورتحال پر پہلے بی جے پی کے انتخابی انچارج دھرمیندر پردھان سے بات کی اور بعد میں وزیر اعظم نریندر مودی کو بھی فون کر کے بتایا کہ انہیں نو ریلیوں میں شرکت کرنی تھی، مگر تاخیر کی وجہ سے وہ پھنس گئے ہیں۔
دوسری جانب بھاگلپور میں کانگریس رہنما راہل گاندھی نے بی جے پی پر شدید تنقید کی۔ انہوں نے کہا کہ “آج بھارت میں صرف 50 سے 60 لوگوں کو ہی خواب دیکھنے کا حق حاصل ہے، جن میں امبانی، اڈانی اور امیت شاہ کے بیٹے شامل ہیں۔” راہل نے طنز کیا کہ “جئے شاہ کو کرکٹ کھیلنا نہیں آتا، پھر بھی وہ پوری ٹیم چلا رہے ہیں، کھیل کھلاڑیوں کا ہونا چاہیے، سیاستدانوں کے بیٹوں کا نہیں۔”آر جے ڈی کے امیدوار اور منیر کے رکن اسمبلی بھائی ویرندر ایک تنازع میں پھنس گئے ہیں۔ ان پر الزام ہے کہ انہوں نے پولنگ کے دوران ایک سب انسپکٹر کو دھمکایا۔ اس واقعے کی ویڈیو سوشل میڈیا پر وائرل ہوئی، جس کے بعد ان کے خلاف ایف آئی آر درج کر لی گئی ہے۔
سیتامڑھی کے ریگا میں ایک جلسے کے دوران کانگریس رہنما پرینکا گاندھی نے بھی سخت لہجہ اختیار کیا۔ انہوں نے الیکشن کمیشن پر الزام لگایا کہ وہ ووٹ چوری کے عمل میں شامل ہے۔ پرینکا نے چیف الیکشن کمشنر گیانیش کمار کو تنبیہ کرتے ہوئے کہا کہ اگر انہوں نے دھاندلی میں کردار ادا کیا تو ریٹائرمنٹ کے بعد بھی سکون کی زندگی نہیں گزار سکیں گے۔انہوں نے مزید کہا کہ “راہل گاندھی نے ان کی تمام حقیقت سامنے رکھ دی ہے، ہریانہ کا انتخاب انہوں نے چرایا، اب بہار میں بھی ویسا ہی کرنے کی تیاری ہے۔”
دوسری طرف مرکزی وزیر گری راج سنگھ نے این ڈی اے کی کامیابی پر اعتماد ظاہر کرتے ہوئے کہا کہ “2010 میں این ڈی اے نے 206 نشستیں جیتی تھیں، اس بار حالات پہلے سے بہتر ہیں، لہٰذا ہمیں اس سے بھی زیادہ کامیابی ملے گی۔”اسی دوران بی جے پی کے اسٹار پرچارک اور مشہور بھوجپوری اداکار پون سنگھ کی ریلی میں بڑی تعداد میں لوگ شریک ہوئے۔ بیتیہ میں ہونے والے جلسے کے دوران ہجوم کے دباؤ سے تقریباً 200 کرسیاں ٹوٹ گئیں، جس سے ایک شخص زخمی ہو گیا۔ پون سنگھ نے دیر سے پہنچنے کے باوجود دو مختلف مقامات پر جلسوں سے خطاب کیا اور ان کے جلسوں میں عوام کا جوش و خروش دیدنی تھا۔