ایران کا دعویٰ امریکی جنگی جہاز کو وارننگ دے کر پیچھے ہٹایا

ایران کا دعویٰ، آبنائے ہرمز میں امریکی جنگی جہاز کو وارننگ دے کر پیچھے ہٹنے پر مجبور کیا، ویڈیو جاری۔

ایران نے دعویٰ کیا ہے کہ اس نے آبنائے ہرمز میں ایک امریکی جنگی جہاز کو سخت وارننگ دے کر واپس جانے پر مجبور کر دیا۔ نجف میں قائم ایرانی قونصل خانے کی جانب سے اس واقعے سے متعلق ایک ویڈیو سوشل میڈیا پلیٹ فارم ایکس پر شیئر کی گئی ہے، جس میں اس کارروائی کو نمایاں طور پر دکھایا گیا ہے۔قونصل خانے نے اپنی پوسٹ میں کہا کہ ناظرین اس ویڈیو کو دیکھیں، کیونکہ چند ہفتے قبل مخالف فریق کی جانب سے یہ دعویٰ کیا گیا تھا کہ ایرانی بحریہ کو مکمل طور پر تباہ کر دیا گیا ہے، جبکہ حقیقت اس کے برعکس سامنے آرہی ہے۔ بیان میں مزید کہا گیا کہ ایرانی بحریہ کے ایک جنگی جہاز نے فیصلہ کن انداز میں دشمن کے جہازوں کو آبنائے ہرمز سے پیچھے ہٹنے پر مجبور کیا۔پوسٹ کے مطابق ایک ایرانی لڑاکا طیارے نے بھی امریکی جہاز کو خبردار کیا کہ اگر وہ دس میل سے زیادہ قریب آیا تو اس پر فائرنگ کی جا سکتی ہے۔ اس کے ساتھ یہ بھی کہا گیا کہ ایران کا ردعمل انتہائی سخت اور خوفناک ہو سکتا ہے۔
شیئر کی گئی ویڈیو، جو ایرانی سرکاری چینل پریس ٹی وی پر بھی نشر کی گئی، میں ایک جنگی جہاز دکھائی دیتا ہے۔ پس منظر میں ایک آواز سنائی دیتی ہے جو کہتی ہے کہ فوری طور پر اس علاقے سے نکل کر بحیرۂ ہند کی طرف واپس جائیں، ورنہ کارروائی کی جائے گی۔ اس کے جواب میں جہاز سے پیغام آتا ہے کہ وہ بین الاقوامی قوانین کے تحت اس راستے سے گزر رہے ہیں۔
اس کے باوجود ایرانی جانب سے وارننگ دوبارہ دی جاتی ہے اور اسے آخری تنبیہ قرار دیا جاتا ہے۔ یہ پیغام تین مرتبہ دہرایا جاتا ہے، جس کے بعد ویڈیو میں دکھایا گیا جہاز دور جاتا ہوا نظر آتا ہے۔یہ واضح نہیں ہو سکا کہ یہ واقعہ کب پیش آیا، تاہم ایران کی جانب سے حالیہ دنوں میں اسی نوعیت کے ایک اور واقعے کا بھی ذکر کیا گیا تھا۔ دوسری طرف، آزاد ذرائع نے اس ویڈیو یا دعوے کی مکمل تصدیق نہیں کی، جس کے باعث صورتحال کے بارے میں مختلف آرا سامنے آ رہی ہیں۔