کلنٹن جوڑےکی ایپسٹین کیس میں کانگریس کوگواہی دینے کی رضامندی

سابق صدر بل اور ہیلری کلنٹن ایپسٹین کیس میں کانگریس کمیٹی کے سامنے پیش ہو کر محدود معلومات فراہم کرنے کے لیے تیار ہوگئے۔

امریکہ کے سابق صدر بل کلنٹن اور سابق وزیر خارجہ ہیلری کلنٹن نے جیفری ایپسٹین سے متعلق جاری پارلیمانی تحقیقات میں پیش ہو کر بیان دینے پر آمادگی ظاہر کر دی ہے۔ یہ پیش رفت ایسے وقت میں سامنے آئی ہے جب چند ہی دنوں بعد اس معاملے پر ووٹنگ ہونا تھی کہ آیا ہاؤس اوور سائٹ کمیٹی کے سامنے پیش ہونے سے انکار کی صورت میں کلنٹن میاں بیوی کو فوجداری توہینِ کانگریس کا مرتکب قرار دیا جائے یا نہیں۔جیفری ایپسٹین، جس پر کم عمر لڑکیوں کے ساتھ جنسی جرائم کے سنگین الزامات تھے، سنہ 2019 میں جیل میں مردہ پایا گیا تھا۔ اس کی موت کو خودکشی قرار دیا گیا، تاہم اس واقعے نے کئی سوالات کو جنم دیا تھا۔ بل کلنٹن نے ماضی میں تسلیم کیا تھا کہ وہ ایپسٹین کو جانتے تھے، لیکن انہوں نے ہمیشہ اس بات کی تردید کی ہے کہ انہیں ایپسٹین کی مبینہ غیر قانونی سرگرمیوں کا علم تھا۔ ان کا کہنا ہے کہ انہوں نے تقریباً بیس سال قبل اس سے ہر قسم کا رابطہ ختم کر دیا تھا۔
ریپبلکن اکثریت کی حامل ہاؤس اوور سائٹ کمیٹی نے گزشتہ ماہ کلنٹن جوڑے کو توہین کا مرتکب قرار دینے کی قرارداد منظور کی تھی۔ قابل ذکر بات یہ ہے کہ اس اقدام کی بعض ڈیموکریٹ ارکان نے بھی حمایت کی تھی، جس سے معاملے کی حساسیت اور سیاسی اہمیت کا اندازہ لگایا جا سکتا ہے۔پیر کی شام بل کلنٹن کے ڈپٹی چیف آف اسٹاف اینجل اورینا نے سوشل میڈیا پلیٹ فارم ایکس پر جاری بیان میں تصدیق کی کہ بل اور ہیلری کلنٹن کمیٹی کے سامنے پیش ہو کر سوالات کے جواب دیں گے۔ کلنٹن میاں بیوی کا مؤقف ہے کہ وہ پہلے ہی تحریری حلف نامے جمع کرا چکے ہیں اور ایپسٹین کے بارے میں اپنے پاس موجود محدود معلومات متعلقہ حکام کو فراہم کر چکے ہیں۔ ان کا کہنا ہے کہ وہ تحقیقات میں مکمل تعاون کے لیے تیار ہیں۔
یہ امر بھی تاریخی اہمیت رکھتا ہے کہ اگر بل کلنٹن کمیٹی کے روبرو پیش ہوتے ہیں تو 1983 کے بعد یہ پہلا موقع ہوگا کہ کوئی سابق امریکی صدر کانگریس کی کسی کمیٹی کے سامنے باضابطہ گواہی دے گا۔ اس پیش رفت کو امریکی سیاست میں ایک اہم مرحلہ قرار دیا جا رہا ہے، کیونکہ اس سے نہ صرف ایپسٹین کیس کے مختلف پہلوؤں پر روشنی پڑ سکتی ہے بلکہ سیاسی حلقوں میں جاری بحث بھی ایک نئے مرحلے میں داخل ہو سکتی ہے۔