ٹی ایم سی رکن پارلیمان کلیان بنرجی پر حملہ، سر زخمی ہوا

ٹی ایم سی رکنِ پارلیمان کلیان بنرجی نے بی جے پی کارکنوں پر حملے کا الزام لگایا، واقعے میں ان کے سر پر چوٹ آئی۔

ترنمول کانگریس (ٹی ایم سی) کے رکنِ پارلیمان کلیان بنرجی نے دعویٰ کیا ہے کہ اتوار کے روز ان پر حملہ کیا گیا، جس کے نتیجے میں ان کے سر پر چوٹ آئی۔ یہ واقعہ اُس وقت پیش آیا جب وہ ضلع ہوگلی کے چندی تلا تھانے کی جانب ایک وفد کے ساتھ یادداشت پیش کرنے جا رہے تھے۔ واقعے کے بعد علاقے میں سیاسی ماحول مزید کشیدہ ہوگیا ہے اور مختلف سیاسی جماعتوں کی جانب سے ایک دوسرے پر الزامات کا سلسلہ جاری ہے۔سوشل میڈیا پر سامنے آنے والی ویڈیوز میں دیکھا جا سکتا ہے کہ کلیان بنرجی اپنے سر کو پکڑے ہوئے دکھائی دے رہے ہیں، جبکہ کچھ دیر بعد وہ زمین پر گر جاتے ہیں۔ بعد ازاں انہیں سر پر کپڑا باندھے ہوئے بھی دیکھا گیا۔ واقعے کے فوراً بعد وہاں موجود کارکنان اور مقامی افراد میں بے چینی پھیل گئی، جبکہ پولیس نے صورتحال کو قابو میں کرنے کی کوشش کی۔
کلیان بنرجی نے الزام لگایا کہ بھارتیہ جنتا پارٹی (بی جے پی) کے کارکنوں نے نہ صرف ان کے ساتھ بدسلوکی کی بلکہ ان پر حملہ بھی کیا۔ ان کا کہنا تھا کہ وہ اکیلے وہاں پہنچ رہے تھے اور ان کے ساتھ کوئی سیکورٹی یا کارکن موجود نہیں تھا۔ ان کے مطابق حملہ آوروں نے پہلے گالی گلوچ کی اور پھر ان کے سر پر گیند نما چیز سے وار کیا، جس سے وہ زخمی ہوگئے اور ان کے سر سے خون بہنے لگا۔زخمی حالت میں خطاب کرتے ہوئے کلیان بنرجی نے کہا کہ عوام خود فیصلہ کریں گے کہ منتخب نمائندوں کے ساتھ اس طرح کا سلوک درست ہے یا نہیں۔ انہوں نے یہ بھی کہا کہ مسلسل ارکانِ پارلیمان کو نشانہ بنایا جا رہا ہے، جو جمہوری اقدار کے لیے تشویشناک بات ہے۔
واضح رہے کہ اس واقعے سے ایک روز قبل ٹی ایم سی کے سینئر رہنما ابھیشیک بنرجی پر بھی جنوبی 24 پرگنہ کے سونارپور علاقے میں حملے کا دعویٰ سامنے آیا تھا۔ ان دونوں واقعات کے بعد مغربی بنگال کی سیاست میں کشیدگی مزید بڑھتی ہوئی دکھائی دے رہی ہے۔