زیلنسکی کا یورپی اتحاد اور دفاع مضبوط بنانے پر زور

زیلنسکی نے یورپ کے اتحاد، مضبوط دفاع اور امریکہ تعاون پر زور دیا، روسی خطرات اور مالی استحکام پر خبردار کیا۔

یوکرین کے صدر وولودیمیر زیلنسکی نے کہا ہے کہ یورپ کا کوئی بھی ملک صرف اپنی ٹیکنالوجی اور مالی وسائل پر بھروسا کرتے ہوئے اپنی مکمل دفاعی حفاظت یقینی نہیں بنا سکتا۔ ان کا کہنا تھا کہ موجودہ عالمی حالات میں کوئی بھی ریاست اکیلے جنگی خطرات کا مقابلہ نہیں کر سکتی، بلکہ اس کے لیے مضبوط اتحاد اور باہمی تعاون ضروری ہے۔انہوں نے جرمنی میں منعقدہ میونخ سکیورٹی کانفرنس سے خطاب کرتے ہوئے کہا کہ روس یورپ کے اتحاد کو توڑنے کے لیے سرمایہ کاری کر رہا ہے۔ ان کے مطابق یورپ کی یکجہتی ہی روسی جارحانہ منصوبوں کے خلاف سب سے مؤثر دفاع ہے اور یہی یورپ کی سب سے بڑی طاقت ہے۔
زیلنسکی نے کہا کہ ولادیمیر پوتن دنیا کے مختلف ممالک، جن میں شمالی کوریا اور چین شامل ہیں، کے ذریعے روس پر عائد پابندیوں سے بچنے کی کوششوں میں کامیاب رہے ہیں۔ ان کا کہنا تھا کہ روس کو اب بھی مالی استحکام حاصل ہے اور اس کا ایک اہم حصہ یورپی سمندروں سے وابستہ ہے۔ انہوں نے نشاندہی کی کہ روسی تیل بردار جہاز بحیرہ بالٹک اور شمالی سمندر میں یورپ کے ساحلوں کے قریب سرگرم رہتے ہیں۔یوکرینی صدر نے مزید کہا کہ یورپی ممالک نے اپنی سلامتی کے بجٹ میں اضافہ کیا ہے، جو ماضی کی کوتاہیوں کی اصلاح کی جانب ایک قدم ہے۔ ان کے مطابق یہ اضافہ اس حقیقت کا اعتراف ہے کہ خطے کو اپنی حفاظت کے لیے زیادہ سنجیدہ اقدامات کرنا ہوں گے۔
اپنے خطاب کے دوران انہوں نے امریکہ کو مخاطب کرتے ہوئے امید ظاہر کی کہ امریکی صدر ان کی بات سن رہے ہیں۔ کانفرنس میں امریکی وزیر خارجہ مارکو روبیو نے بھی کہا کہ امریکہ اور یورپ ایک ساتھ ہیں اور دونوں کا مستقبل ایک دوسرے سے جدا نہیں ہو سکتا۔ تاہم انہوں نے اقوام متحدہ پر تنقید کرتے ہوئے کہا کہ عالمی تنازعات کے حل میں اس کا کردار مؤثر ثابت نہیں ہوا، البتہ امریکہ یورپی اتحادیوں کے ساتھ مل کر کام جاری رکھے گا اور اس شراکت داری کو مزید مضبوط بنایا جائے