بہار میں این ڈی اے کا چہرہ کون؟ مودی کے بیان نے بحث تیز کر دی

بہار کی انتخابی ریلی میں وزیراعظم مودی نے نتیش کمار کی کارکردگی کو سراہا اور این ڈی اے کی جیت کا یقین ظاہر کیا، لیکن وزیراعلیٰ کے چہرے پر ابہام برقرار رکھا۔

بہار میں اسمبلی انتخابات کی گہما گہمی کے درمیان وزیراعظم نریندر مودی کے حالیہ بیانات نے سیاسی منظرنامے کو مزید دلچسپ بنا دیا ہے۔ ان کے خطاب سے یہ تاثر ابھر کر سامنے آیا ہے کہ این ڈی اے کی مہم میں وزیراعلیٰ نتیش کمار اب بھی مرکزی حیثیت رکھتے ہیں، اگرچہ مودی نے انہیں براہِ راست وزیر اعلیٰ کا امیدوار قرار دینے سے گریز کیا۔سمستی پور میں انتخابی ریلی سے خطاب سے پہلے وزیراعظم نے بھارت رتن کرپوری ٹھاکر کے آبائی گاؤں جا کر خراجِ عقیدت پیش کیا۔ مبصرین کے مطابق یہ قدم سیاسی پیغام کے طور پر دیکھا جا رہا ہے، کیونکہ اسی کے ساتھ این ڈی اے نے اپنی انتخابی مہم کا باضابطہ آغاز کر دیا۔اپنے خطاب میں وزیراعظم مودی نے نتیش کمار کی کارکردگی کو سراہتے ہوئے کہا کہ بہار میں ترقیاتی منصوبے تیزی سے آگے بڑھ رہے ہیں، بجلی، پانی اور بنیادی سہولتوں کے شعبے میں نمایاں بہتری آئی ہے۔ انہوں نے کہا کہ این ڈی اے عوامی خدمت، نظم و نسق اور ترقی کی ضمانت ہے، جب کہ مخالف جماعتوں کے دور میں ریاست بدامنی اور ’جنگل راج‘ کا شکار تھی۔
دلچسپ بات یہ ہے کہ مودی نے نتیش کمار کا ذکر تو کیا، مگر ساتھ ہی چراغ پاسوان اور جیتن رام مانجھی جیسے دیگر اتحادی رہنماؤں کے نام بھی لیے۔ اس توازن نے سیاسی مبصرین کو یہ سوچنے پر مجبور کر دیا کہ آیا مودی نے نتیش کمار کو واضح طور پر این ڈی اے کا وزیر اعلیٰ چہرہ قرار دیا ہے یا نہیں۔سیاسی حلقوں کا خیال ہے کہ مودی نے ایک ایسا بیان دیا ہے جو ہر صورتِ حال میں مؤثر رہے گا۔ اگر انتخاب کے بعد نتیش کمار ہی وزیراعلیٰ بنتے ہیں تو کہا جا سکے گا کہ مودی نے پہلے ہی اشارہ دے دیا تھا، اور اگر نہیں بنتے تو ان کے الفاظ کی دوسری تعبیر پیش کر دی جائے گی۔ادھر مرکزی وزرا کے بیانات بھی اس بحث کو مزید بڑھا رہے ہیں۔ کبھی کہا جاتا ہے کہ وزیر اعلیٰ کا فیصلہ انتخابات کے بعد اتحادی جماعتوں کی مشاورت سے ہوگا، اور کبھی یہ تاثر دیا جاتا ہے کہ قیادت نتیش کمار ہی کے ہاتھوں میں رہے گی۔
سیاسی مبصرین کے مطابق، مودی کے بیانات نے بہار میں این ڈی اے کے اتحاد کو مضبوط پیغام دیا ہے، مگر ساتھ ہی انہوں نے اپوزیشن اور اتحادیوں دونوں کو سوچنے پر مجبور کر دیا ہے۔ بہار کے ووٹر اب یہ طے کریں گے کہ ’سوشاسن بابو‘ کہلانے والے نتیش کمار پر اعتماد برقرار رہے گا یا فیصلہ کسی نئی سمت میں جائے گا۔