مغربی بنگال انتخاب: اویسی اور ہما کبیر اتحاد کا بڑا اعلان

اویسی اور ہمایوں کبیر کا اتحاد، مغربی بنگال انتخابات میں 182 سے زائد نشستوں پر مشترکہ امیدوار میدان میں اتارنے کا اعلان

مغربی بنگال اسمبلی انتخابات کے سلسلے میں ایک نئی سیاسی پیش رفت سامنے آئی ہے جہاں آل انڈیا مجلس اتحاد المسلمین (اے آئی ایم آئی ایم) اور عام جنتا اُنیان پارٹی نے باقاعدہ اتحاد کا اعلان کر دیا ہے۔ اس اہم فیصلے کی اطلاع دونوں جماعتوں کے قائدین نے مشترکہ پریس کانفرنس کے ذریعے دی، جس میں سیاسی حکمتِ عملی اور آئندہ لائحہ عمل پر بھی روشنی ڈالی گئی۔اس موقع پر اے آئی ایم آئی ایم کے سربراہ اسدالدین اویسی اور عام جنتا اُنیان پارٹی کے بانی ہمایوں کبیر نے کہا کہ دونوں جماعتوں کے درمیان زیادہ تر نشستوں پر اتفاق ہو چکا ہے، جب کہ چند حلقوں کے بارے میں بات چیت ابھی جاری ہے۔ اویسی نے یقین دلایا کہ باقی ماندہ نشستوں پر بھی جلد اتفاق رائے قائم کر لیا جائے گا۔
ہمایوں کبیر، جو ماضی میں ترنمول کانگریس سے وابستہ رہے ہیں اور بعد ازاں پارٹی سے الگ ہو گئے تھے، نے پریس کانفرنس میں کہا کہ یہ اتحاد عوامی مفاد کو سامنے رکھ کر کیا گیا ہے۔ ان کا کہنا تھا کہ دونوں جماعتیں مل کر انتخابات میں بھرپور حصہ لیں گی اور تقریباً 182 سے 192 امیدوار میدان میں اتارنے کا منصوبہ ہے۔ انہوں نے مزید بتایا کہ ریاستی پارٹی دفتر کے افتتاح کے بعد امیدواروں کی فہرست جاری کی جائے گی، جس میں مختلف حلقوں سے امیدواروں کے ناموں کا اعلان کیا جائے گا۔دوسری جانب اسدالدین اویسی نے کہا کہ اس اتحاد کا بنیادی مقصد مغربی بنگال میں سیاسی توازن پیدا کرنا اور خاص طور پر مسلم اقلیت کو ایک مضبوط سیاسی آواز فراہم کرنا ہے۔ ان کے مطابق، یہ اتحاد صرف انتخابی مفاد تک محدود نہیں بلکہ ایک طویل مدتی سیاسی حکمت عملی کا حصہ ہے جس کے ذریعے نئی قیادت کو آگے لایا جائے گا۔
انہوں نے مزید کہا کہ ان کی کوشش ہوگی کہ یہ اتحاد کامیاب ثابت ہو اور عوامی مسائل کو مؤثر انداز میں اسمبلی تک پہنچایا جا سکے۔ ان کا ماننا ہے کہ موجودہ سیاسی حالات میں ایک متبادل قیادت کی ضرورت ہے، جسے یہ اتحاد پورا کرنے کی کوشش کرے گا۔واضح رہے کہ مغربی بنگال میں اسمبلی انتخابات دو مرحلوں میں منعقد ہوں گے، جن کی تاریخیں 23 اور 29 اپریل مقرر کی گئی ہیں، جبکہ ووٹوں کی گنتی 4 مئی کو کی جائے گی۔