غزہ جنگ بندی پر امریکی تجویز جلد متوقع،اسرائیل کو بعض نکات پر تحفظات

امریکہ جلد غزہ جنگ بندی کی نئی تجویز پیش کرنے والا ہے، جس میں حماس کے خلاف اسرائیل کے اہم مطالبات کو نظرانداز کیے جانے پر اسرائیل کو تحفظات ہیں، جبکہ امداد کی بحالی کیلئے نیا ادارہ قائم کیا جا رہا ہے۔

امریکہ کی جانب سے غزہ میں جنگ بندی اور امداد کی بحالی کے لیے جلد ایک نئی تجویز پیش کیے جانے کی اطلاعات ہیں۔ اسرائیلی میڈیا نے اس بات کا انکشاف کیا ہے کہ اس تجویز میں اسرائیل کے اہم مطالبات کو نظرانداز کیا جا رہا ہے، خاص طور پر حماس کے حوالے سے۔عبرانی اخبار ’’ہیوم ڈیلی‘‘ کے مطابق، امریکی تجویز میں اسرائیل کی جانب سے غزہ میں حماس کو غیر مسلح کرنے اور اسے حکومتی ذمہ داریوں سے بے دخل کرنے کی شرط کو شامل نہیں کیا گیا۔ اطلاعات کے مطابق، اس تجویز میں حماس کو اس کی قیادت کے تحفظ کی ضمانت دینے اور مستقبل میں غزہ کے شہری انتظام میں اس کے کردار کو تسلیم کرنے کی پیشکش کی جا سکتی ہے۔
سفارتی ذرائع کے مطابق، یہ تجویز آئندہ 24 گھنٹوں میں باقاعدہ طور پر اعلان کیے جانے کی توقع ہے۔ ابتدائی مرحلے میں، تجویز کا مقصد انسانی امداد کی بحالی پر مرکوز ہو گا، جس میں امریکہ کا کلیدی کردار ہوگا۔ دوسرے مرحلے میں غزہ کی تعمیر نو اور اس کی نگرانی امریکہ کے ہاتھ میں ہو گی۔
امریکہ نے غزہ میں امداد کی ترسیل کے لیے ایک نیا غیر سرکاری ادارہ قائم کرنے کا فیصلہ کیا ہے جس کا نام ’’غزہ ہیومینیٹیرین فاؤنڈیشن (GHF)‘‘ رکھا گیا ہے۔ یہ فاؤنڈیشن غزہ میں امدادی سامان کی تقسیم کرے گا، اور عالمی ادارہ خوراک کے سابق سربراہ، ڈیوڈ بیزلی کو اس کا سربراہ مقرر کیا گیا ہے۔ اس منصوبے میں چار امدادی مراکز کے ذریعے 12 لاکھ افراد کو خوراک، پانی اور دیگر ضروری سامان فراہم کرنے کا مقصد رکھا گیا ہے۔دوسری جانب، غزہ میں کام کرنے والی اقوام متحدہ اور دیگر امدادی تنظیموں نے اس نئے فاؤنڈیشن کے ساتھ تعاون کرنے سے انکار کیا ہے۔ ان کا کہنا ہے کہ یہ اقدام بنیادی انسانی اصولوں کے خلاف ہے۔
امریکہ نے اس منصوبے کی کامیابی کے لیے مختلف ممالک اور اقوام متحدہ پر دباؤ ڈالنے کی کوششیں تیز کر دی ہیں تاکہ وہ اس فاؤنڈیشن کو مالی امداد فراہم کریں اور اس کے ساتھ تعاون کریں۔ امریکی سفارت کاروں نے اس منصوبے کی تفصیلات اقوام متحدہ اور سلامتی کونسل کے ارکان کو بھی فراہم کی ہیں۔اب یہ امید کی جا رہی ہے کہ غزہ میں امدادی سرگرمیاں جلد بحال ہو سکتی ہیں۔ امریکہ، اسرائیل اور ’’غزہ ہیومینیٹیرین فاؤنڈیشن‘‘ کے نمائندے غزہ میں حماس کے کنٹرول کے بغیر امدادی سامان کی ترسیل کے لیے ایک معاہدے کے قریب پہنچنے کی توقع کر رہے ہیں۔