ٹرمپ نے کینیڈا کی بورڈ آف پیس میں شمولیت کی دعوت واپس لے لی
ٹرمپ نے ڈیووس تقریر کے بعد کینیڈا کی بورڈ آف پیس میں شمولیت کی دعوت منسوخ کر دی۔
امریکی صدر ڈونلڈ ٹرمپ نے کینیڈا کو دی گئی ’’بورڈ آف پیس‘‘ میں شمولیت کی دعوت منسوخ کر دی ہے۔ یہ فیصلہ ایک ایسے وقت میں سامنے آیا ہے جب عالمی سطح پر معاشی اور سیاسی معاملات پر بڑی طاقتوں کے کردار پر بحث شدت اختیار کر چکی ہے۔ بین الاقوامی خبر رساں ادارے کے مطابق صدر ٹرمپ کا یہ اقدام اس تقریر کے بعد سامنے آیا جو کینیڈا کے وزیرِ اعظم مارک کارنی نے سوئٹزرلینڈ کے شہر ڈیووس میں منعقدہ ورلڈ اکنامک فورم کے دوران کی۔مارک کارنی نے اپنی تقریر میں بالواسطہ طور پر طاقتور ممالک پر تنقید کرتے ہوئے کہا تھا کہ بعض ریاستیں اقتصادی انضمام، تجارتی پالیسیوں اور محصولات کو اپنے سیاسی اور معاشی مفادات کے لیے بطور ہتھیار استعمال کر رہی ہیں، جو عالمی استحکام کے لیے نقصان دہ ثابت ہو سکتا ہے۔ ان کے اس مؤقف کو کئی حلقوں میں بڑی طاقتوں کے خلاف واضح پیغام کے طور پر دیکھا گیا۔
اس تقریر کے فوراً بعد امریکی صدر ڈونلڈ ٹرمپ نے اپنے سوشل میڈیا پلیٹ فارم ’’ٹروتھ سوشل‘‘ پر ایک بیان جاری کیا، جس میں انہوں نے کہا کہ کینیڈا کو ’’بورڈ آف پیس‘‘ میں شامل کرنے کے لیے دیا گیا دعوت نامہ واپس لیا جا رہا ہے۔ صدر ٹرمپ نے اپنے پیغام میں واضح کیا کہ یہ پیغام اس فیصلے کی باضابطہ اطلاع تصور کیا جائے۔یاد رہے کہ اسی ہفتے ڈیووس میں صدر ٹرمپ نے غزہ سے متعلق ’’بورڈ آف پیس‘‘ کے قیام کا باقاعدہ اعلان کیا تھا۔ ان کا کہنا تھا کہ دنیا کے کئی ممالک اس بورڈ میں شامل ہونے کے خواہشمند ہیں اور اس کا مقصد غزہ میں امن کے قیام کے لیے عالمی سطح پر مشترکہ کوششوں کو فروغ دینا ہے۔ صدر ٹرمپ کے مطابق اس فورم میں مختلف خطوں کے بااثر اور تجربہ کار رہنما شامل ہیں، جو مل کر ایک پائیدار حل کی طرف بڑھ سکتے ہیں۔
اس تقریب میں پاکستان کے وزیرِ اعظم شہباز شریف نے فیلڈ مارشل سید عاصم منیر کے ہمراہ شرکت کی۔ پاکستان کے علاوہ مصر، اردن، متحدہ عرب امارات، انڈونیشیا، ترکی، سعودی عرب اور قطر بھی اس ’’بورڈ آف پیس‘‘ کا حصہ بن چکے ہیں۔ مزید برآں، البانیہ، ارجنٹینا، ہنگری، اسرائیل، قزاقستان، پیراگوئے اور ازبکستان نے بھی اس بورڈ میں شمولیت کی تصدیق کر دی ہے۔صدر ٹرمپ کا کہنا تھا کہ انہیں اُمید ہے کہ مختلف ممالک کے یہ رہنما باہمی تعاون کے ذریعے غزہ میں جاری بحران کے خاتمے اور امن کے فروغ کے لیے مؤثر کردار ادا کریں گے۔
