داؤسا (راجستھان) میں المناک سڑک حادثہ، 11 افراد جاں بحق، 8 زخمی

راجستھان داؤسا میں پِک اَپ وین ٹرک سے ٹکرا گئی، 11 جاں بحق، 8 زخمی، بیشتر درشن سے واپس لوٹ رہے تھے۔

راجستھان کے ضلع داؤسا میں بدھ کی علی الصبح ایک افسوسناک ٹریفک حادثہ پیش آیا، جس میں 11 قیمتی جانیں ضائع ہو گئیں اور آٹھ افراد زخمی ہو گئے۔ جاں بحق ہونے والوں میں سات کم عمر بچے اور چار خواتین شامل ہیں۔پولیس حکام کے مطابق حادثہ اس وقت پیش آیا جب ایک پِک اَپ وین سڑک کے کنارے کھڑے ایک بھاری بھرکم ٹرک سے جا ٹکرائی۔ یہ تمام لوگ پِک اَپ وین میں سوار تھے اور مذہبی زیارت مکمل کر کے واپس اپنے گاؤں جا رہے تھے۔داؤسا کے پولیس سپرنٹنڈنٹ سَاگر نے میڈیا کو بتایا کہ یہ قافلہ اتر پردیش کے ضلع ایٹہ سے تعلق رکھتا تھا اور کھاٹو شیم اور سالاسر بالا جی مندر کی درشن کے بعد وطن واپس لوٹ رہا تھا۔ ان کے مطابق حادثہ منوہرپور کے قریب بدھ کی صبح تقریباً چار سے پانچ بجے کے درمیان پیش آیا۔
پولیس کا کہنا ہے کہ پِک اَپ وین میں 20 سے زائد افراد سوار تھے۔ ڈرائیور نے غالباً غفلت یا نیند کے باعث گاڑی پر قابو کھو دیا، جس کے نتیجے میں وین سیدھی سروس لین پر کھڑے ٹرک سے ٹکرا گئی۔ تصادم اتنا شدید تھا کہ گاڑی کا اگلا حصہ بری طرح سے تباہ ہو گیا۔پولیس افسران نے مزید بتایا کہ جائے حادثہ پر ہی 10 افراد کی موت واقع ہو گئی، جبکہ ایک زخمی خاتون کو جے پور کے ایس ایم ایس اسپتال منتقل کیا گیا جہاں وہ زخموں کی تاب نہ لاتے ہوئے چل بسی۔ دیگر زخمیوں کو مختلف اسپتالوں میں علاج کے لیے بھیجا گیا ہے، جن میں سے ایک کی حالت نازک بتائی جا رہی ہے۔
حادثے کے بعد علاقے میں کہرام مچ گیا۔ مقامی افراد اور پولیس نے فوری طور پر امدادی کارروائیاں شروع کیں۔ لاشوں اور زخمیوں کو قریبی اسپتالوں میں پہنچایا گیا۔ اس سانحے کے بعد مقتولین کے گاؤں میں صفِ ماتم بچھ گئی ہے اور ہر طرف غم و اندوہ کا ماحول ہے۔پولیس نے حادثے کی مکمل تحقیقات شروع کر دی ہیں تاکہ یہ معلوم کیا جا سکے کہ حادثے کی اصل وجہ ڈرائیور کی لاپرواہی تھی یا کوئی اور تکنیکی خرابی پیش آئی۔