پونے کے مَوال میں پل گرنے سے افسوسناک حادثہ

پونے کے مَوال میں اندرا ئنی دریا پر پل گرنے سے دو افراد جاں بحق اور کئی زخمی، حکومت نے تحقیقات اور امدادی کارروائیاں شروع کر دی ہیں۔

مہاراشٹر کے ضلع پونے کے مَوال تحصیل میں واقع ایک تفریحی مقام، کُندمالا کے قریب اندرا ئنی دریا پر قائم ایک پرانا پل اتوار کی سہ پہر اچانک گر گیا، جس کے نتیجے میں کئی سیاح متاثر ہوئے۔ اطلاعات کے مطابق، حادثے میں دو افراد جاں بحق ہو گئے جب کہ متعدد زخمی ہوئے ہیں، جن میں سے بعض کی حالت تشویش ناک ہے۔پولیس کا کہنا ہے کہ حادثہ پِمپری-چِنچوڑ تھانے کی حدود میں پیش آیا، اور اب تک 12 افراد کے زخمی ہونے کی تصدیق ہوئی ہے۔ شبہ ظاہر کیا جا رہا ہے کہ کچھ افراد دریا میں بہہ گئے ہیں، جب کہ 10 سے 15 لوگوں کے پھنسے ہونے کی بھی اطلاعات ہیں۔ این ڈی آر ایف کی ٹیم جائے وقوعہ پر موجود ہے اور بچاؤ کارروائیاں جاری ہیں۔
یہ واقعہ اُس وقت پیش آیا جب چھٹی کے دن بڑی تعداد میں لوگ تفریح کے لیے وہاں موجود تھے۔ حادثے کی سنگینی کو دیکھتے ہوئے امدادی سرگرمیوں کو تیز کر دیا گیا ہے۔وزیراعلیٰ دیویندر فڑنویس اور نائب وزیراعلیٰ اجیت پوار نے واقعے پر افسوس کا اظہار کرتے ہوئے جاں بحق افراد کے اہل خانہ سے ہمدردی ظاہر کی ہے۔ فڑنویس نے اعلان کیا ہے کہ دریا میں بہہ جانے والوں کی تلاش جنگی بنیادوں پر جاری ہے، اور این ڈی آر ایف کی ٹیمیں پوری طرح متحرک ہیں۔
اجیت پوار نے اس واقعے کو افسوسناک قرار دیا اور کہا کہ پل کی خستہ حالی سے متعلق ابتدائی رپورٹیں موصول ہوئی ہیں۔ انھوں نے وعدہ کیا کہ واقعے کی مکمل تحقیقات ہوں گی، اور اگر کسی قسم کی لاپروائی ثابت ہوتی ہے تو ذمہ داروں کے خلاف سخت کارروائی کی جائے گی۔علاقائی افسران کا کہنا ہے کہ پل کی حالت خاصی پرانی تھی، اور اس بارے میں مقامی لوگوں نے متعدد بار شکایات بھی کی تھیں۔ تاہم، اب تک اس پر کوئی متبادل انتظام نہیں کیا گیا تھا۔شہری تنظیموں اور سیاسی رہنماؤں نے بھی حکومت پر تنقید کی ہے اور مطالبہ کیا ہے کہ ریاست بھر میں دریا کے پلوں کا فوری آڈٹ کیا جائے تاکہ آئندہ ایسے واقعات سے بچا جا سکے۔