ریسکیو ٹیموں کی بروقت کارروائی، 274 یاتریوں کی جان بچائی گئی

اترکاشی میں بادل پھٹنے سے تباہی، دو ہلاک، 274 افراد محفوظ، ریسکیو جاری، متعدد ریاستوں کے یاتری شامل، حکومت متحرک۔

منگل کے روز اتراکھنڈ کے ضلع اترکاشی میں شدید بارش کے بعد بادل پھٹنے کا واقعہ پیش آیا جس سے علاقے میں شدید تباہی ہوئی ہے۔ قدرتی آفت کے بعد سے مقامی انتظامیہ اور مرکزی ایجنسیاں مسلسل امدادی اور بچاؤ کے کاموں میں مصروف ہیں۔اتراکھنڈ کے وزیر اعلیٰ، پشکر سنگھ دھامی نے ایک بیان میں بتایا ہے کہ اب تک (جمعرات دوپہر تین بجے تک) 274 افراد کو محفوظ مقام پر منتقل کیا جا چکا ہے۔ ان کے مطابق، “بادل پھٹنے سے کافی نقصان ہوا ہے۔ کئی علاقے بری طرح متاثر ہوئے ہیں۔ بجلی کی ترسیل کی لائنیں تباہ ہو چکی ہیں جب کہ سڑکوں پر لینڈ سلائیڈنگ کی وجہ سے آمد و رفت مکمل طور پر بند ہو گئی ہے۔”
وزیراعلیٰ کا کہنا تھا کہ ابتدائی طور پر 190 افراد کو محفوظ مقام پر پہنچایا گیا تھا، جب کہ ریسکیو ٹیموں کی کوششوں سے اب تک مجموعی طور پر 274 افراد کو بچایا جا چکا ہے۔ریاست کے چیف سیکریٹری، آنند وردھن نے اب تک دو افراد کی لاشیں ملی ہیں۔ ان کے مطابق، “زخمیوں کو فوری طور پر اسپتال منتقل کر دیا گیا ہے اور خوش قسمتی سے وہ سب خطرے سے باہر ہیں۔”ریاستی آفاتِ انتظامیہ کے سیکریٹری، ونود سمن نے بتایا کہ اب تک 274 افراد کو گنگوتری اور ملحقہ علاقوں سے ہرشیل منتقل کیا گیا ہے۔ ان تمام افراد کو محفوظ تصور کیا جا رہا ہے۔
انھوں نے بتایا کہ متاثرین میں ملک کی مختلف ریاستوں سے آئے ہوئے یاتری شامل ہیں، جن میں گجرات سے 131، مدھیہ پردیش سے 21، مہاراشٹرا سے 12، اتر پردیش سے 12، راجستھان سے 6، آسام سے 5، تلنگانہ سے 3 اور پنجاب سے ایک یاتری شامل ہے۔ضلع انتظامیہ، آفاتِ انتظامیہ، آئی ٹی بی پی، این ڈی آر ایف، ایس ڈی آر ایف اور دیگر ایجنسیاں مل کر اس ہنگامی صورت حال سے نمٹنے میں مصروف ہیں۔ حکام کے مطابق، فی الحال ان کی ترجیح تمام پھنسے ہوئے لوگوں کو بحفاظت نکالنا اور محفوظ مقامات پر پہنچانا ہے۔ موت کے حتمی اعداد و شمار ابھی جاری نہیں کیے گئے۔