ابھرتی ماڈل شیتل کے قتل نے مچا دی سنسنی

پانی پت کی ابھرتی ماڈل شیتل عرف سِمی شوٹنگ کے بعد لاپتا ہوئی، دو دن بعد اس کی گلا کٹی لاش سونی پت میں ملی، پولیس قتل کی گتھی سلجھانے میں مصروف ہے۔

پانی پت کی 23 سالہ ماڈل شیتل، جو ہریانہ کی میوزک ویڈیوز میں “سِمی چوہدری” کے نام سے پہچانی جاتی تھیں، 14 جون کو شوٹنگ کے لیے گاؤں اہر روانہ ہوئیں لیکن واپس نہ آئیں۔ دیر تک رابطہ نہ ہونے پر اہل خانہ نے گمشدگی کی رپورٹ درج کروائی۔16جون کو سونی پت کے ایک علاقے میں نہر کے قریب ایک لڑکی کی لاش ملی، جسے گلا کاٹ کر قتل کیا گیا تھا۔ لاش کی شناخت شیتل کے جسم پر بنے ٹیٹوز کے ذریعے ہوئی، جس کی بہن نے بھی تصدیق کی۔ پولیس کے مطابق یہ قتل ایک منصوبہ بند کارروائی کا نتیجہ لگتا ہے کیونکہ قتل کے بعد لاش کو دوسری جگہ منتقل کر کے پھینکا گیا۔
تحقیقات کے دوران معلوم ہوا کہ شیتل شوٹنگ کے روز اپنے دوست سنیل کے ساتھ تھی، جسے زخمی حالت میں پانی پت کے اسپتال میں داخل کرایا گیا۔ ان کی کار بھی نہر سے برآمد ہوئی ہے۔شیتل کے خاندان نے قتل میں سنیل کے ملوث ہونے کا خدشہ ظاہر کیا ہے۔ ان کا کہنا ہے کہ مقتولہ نے ویڈیو کال پر بتایا تھا کہ اس کا بوائے فرینڈ اسے کسی بات پر مجبور کر رہا ہے۔
پانی پت اور سونی پت پولیس نے مشترکہ ٹیم بنا کر تفتیش شروع کر دی ہے، جس میں موبائل ریکارڈ، سی سی ٹی وی فوٹیج، اور سوشل میڈیا سرگرمیوں کا جائزہ لیا جا رہا ہے تاکہ سچائی سامنے آ سکے۔