مودی کے بہار دورے سے قبل تیجسوی کا طنز اور سخت حملہ

تیجسوی نے مودی پر تنقید کی، کہا جملے زیادہ، عوامی مسائل پر خاموشی اور پاکستان کے ساتھ تعلقات پر سوال۔

پٹنہ: وزیراعظم نریندر مودی کے بہار کے متوقع دورے سے ایک دن قبل، راشٹریہ جنتا دل (آر جے ڈی) کے رہنما اور سابق نائب وزیر اعلیٰ تیجسوی یادو نے وزیراعظم پر سخت تنقید کی ہے۔ تیجسوی کا کہنا ہے کہ مودی صرف دعوے کرتے ہیں، زمینی حقیقتوں سے ان کا کوئی تعلق نہیں۔ انہوں نے طنزیہ انداز میں کہا کہ “مودی جی کل بہار میں صرف جملوں کی بارش کرنے آ رہے ہیں۔”تیجسوی یادو نے وزیراعظم کی تقاریر پر سوالات اٹھاتے ہوئے کہا کہ وہ ہمیشہ غیر ضروری موضوعات پر بات کرتے ہیں جیسے گھسپیٹھ یا پاکستان، لیکن عوامی مسائل جیسے غربت، تعلیم اور صحت پر بات کرنے سے گریز کرتے ہیں۔ ان کا کہنا تھا کہ بہار کے عوام اب صرف تقریریں سننا نہیں چاہتے بلکہ عملی کام دیکھنا چاہتے ہیں۔
سرکاری اسپتال کی حالت زار پر نشانہ
تیجسوی نے مودی کے دورے سے قبل پورنیا کے گورنمنٹ میڈیکل کالج اینڈ ہاسپٹل (GMCH) کی خستہ حالی کی تصاویر سوشل میڈیا پر شیئر کیں۔ انہوں نے چیلنج کرتے ہوئے کہا، “وزیراعظم کو چاہیے کہ وہ کل GMCH کا دورہ کریں، اور اپنے اتحادی نتیش کمار کو بھی ساتھ لے جائیں تاکہ عوام کو اصل حالات سے واقفیت ہو۔”
بھارت-پاکستان کرکٹ میچ پر بھی طنز
وزیراعظم مودی کی سابقہ تقاریر کا حوالہ دیتے ہوئے تیجسوی نے طنزیہ انداز میں کہا کہ “مودی جی کہتے تھے کہ ان کی رگوں میں سندور دوڑتا ہے، اور آج وہی لوگ پاکستان کے ساتھ میچ کروا رہے ہیں۔” انہوں نے بھارتیہ جنتا پارٹی (بی جے پی) پر الزام عائد کیا کہ وہ پاکستان کے ساتھ تعلقات کو اپنی سہولت کے مطابق بناتی اور توڑتی ہے۔تیجسوی نے کہا، “بی جے پی کبھی سیفائر کرتی ہے، کبھی سرجیکل اسٹرائیک کی بات کرتی ہے، اور کبھی کہتی ہے خون اور پانی ساتھ نہیں بہ سکتے۔ لیکن جب ان کے مفادات ہوتے ہیں تو سب کچھ بھلا دیا جاتا ہے۔