آپریشن سندور کے بعد تیز پرتاپ یادوکا جذبہ حب الوطنی سے بھرپور بیان

آپریشن سندور کے بعد تیز پرتاپ یادو نے کہا کہ وہ تربیت یافتہ پائلٹ ہیں اور ملک کے لیے جان دینا بھی فخر سمجھتے ہیں۔

پہلگام میں ہونے والے دہشت گرد حملے کے بعد بھارت نے “آپریشن سندور” کے تحت پاکستان میں داخل ہو کر فضائی کارروائی کی، جس میں متعدد دہشت گرد ٹھکانے تباہ کیے گئے۔ اس کامیاب کارروائی کے بعد ملک بھر میں حب الوطنی کا جذبہ عروج پر ہے۔اسی دوران بہار کے سابق وزیر اعلیٰ لالو پرساد یادو کے بیٹے اور آر جے ڈی رہنما تیز پرتاپ یادو کا ایک بیان سوشل میڈیا پر خاصا توجہ حاصل کر رہا ہے۔ انھوں نے اپنے ایک پیغام میں کہا کہ اگر ان کی پائلٹ کی تربیت ملک کے کام آ سکتی ہے تو وہ ہر وقت ملک کی خدمت کے لیے تیار ہیں۔
تیز پرتاپ نے یہ بھی بتایا کہ انھوں نے باقاعدہ پائلٹ کی تربیت حاصل کی ہے اور اگر ملک کے لیے جان بھی دینی پڑی تو وہ اسے اپنے لیے فخر سمجھیں گے۔ اپنے پیغام کے ساتھ انھوں نے تربیت کے دنوں کی تصاویر اور پائلٹ لائسنس کی تصویر بھی شیئر کی۔ آخر میں انھوں نے “جے ہند!” کے نعرے کے ساتھ اپنے بیان کا اختتام کیا۔