پٹنہ یونیورسٹی میں نتیش کمار کے خلاف طلبہ احتجاج

پٹنہ یونیورسٹی میں نتیش کمار کی آمد پر طلبہ کا شدید احتجاج، نعرے بازی، کشیدگی کے باوجود افتتاح مکمل ہوا۔

بہار کے دارالحکومت پٹنہ میں اس وقت کشیدہ صورت حال پیدا ہو گئی جب وزیرِ اعلیٰ نتیش کمار پٹنہ یونیورسٹی کے نئے انتظامی عمارت کے افتتاح کے لیے وہاں پہنچے۔ ان کی آمد کے موقع پر یونیورسٹی کے طلبہ کے ایک گروہ نے شدید احتجاج کیا، جس کے باعث تقریب کا ماحول خاصا گرم ہو گیا۔اطلاعات کے مطابق طلبہ کی ناراضگی کی بنیادی وجہ یہ تھی کہ افتتاحی تقریب میں پٹنہ یونیورسٹی اسٹوڈنٹ یونین کے عہدیداران اور متعدد طلبہ کو مدعو نہیں کیا گیا تھا۔ اسی بات پر برہمی کا اظہار کرتے ہوئے جیسے ہی وزیرِ اعلیٰ تقریب کے مقام پر پہنچے، کچھ طلبہ نے گو بیک کے نعرے لگانے شروع کر دیے۔ دیکھتے ہی دیکھتے احتجاج میں شدت آ گئی اور موقع پر افرا تفری جیسی کیفیت پیدا ہو گئی۔
اسی دوران این ڈی اے کی حمایت کرنے والے طلبہ کا ایک دوسرا گروہ بھی سرگرم ہو گیا، جنہوں نے وزیرِ اعلیٰ کے حق میں نعرے بازی شروع کر دی۔ اس طرح دونوں گروہوں کے درمیان نعرے بازی کا سلسلہ کافی دیر تک جاری رہا، جس سے ماحول مزید کشیدہ ہو گیا۔تقریب میں نائب وزرائے اعلیٰ سمراٹ چودھری اور وجے کمار سنہا بھی موجود تھے۔ صورت حال کو قابو میں کرنے کے لیے انہوں نے طلبہ سے بات چیت کرنے کی کوشش کی اور انہیں سمجھانے کی کوشش کی کہ وہ پرامن رہیں۔ اس کے علاوہ ریاست کے وزیرِ تعلیم سنیل کمار نے بھی مظاہرہ کرنے والے طلبہ سے گفتگو کی، تاہم طلبہ اپنی مانگوں پر قائم رہے اور احتجاج ختم کرنے پر آمادہ نہیں ہوئے۔
ذرائع کے مطابق حالات اس وقت مزید بگڑ گئے جب وزیرِ تعلیم کو بھی طلبہ کے سخت ردِ عمل کا سامنا کرنا پڑا، جس کے بعد انہیں وہاں سے واپس جانا پڑا۔ بڑھتی ہوئی کشیدگی کو دیکھتے ہوئے سیکیورٹی کے انتظامات سخت کر دیے گئے تاکہ کسی ناخوشگوار واقعے سے بچا جا سکے۔تمام تر ہنگامے اور مخالفت کے باوجود وزیرِ اعلیٰ نے پروگرام جاری رکھا اور نئے انتظامی عمارت کا افتتاح انجام دیا۔ تاہم اس پورے واقعے نے واضح کر دیا کہ طلبہ میں تقریب کے انعقاد کے طریقۂ کار پر شدید ناراضگی پائی جاتی ہے، جو کھل کر احتجاج کی صورت میں سامنے آئی۔