جوابی کارروائی: ایران نے اسرائیل پر میزائل داغ دیے

ایران نے اسرائیل پر “ٹرُو پرامس 3” کے تحت جوابی کارروائی کرتے ہوئے فوجی مراکز پر میزائل حملے کیے، جب کہ اسرائیل نے دفاعی نظام متحرک کر دیا اور عوام کو گھروں میں رہنے کی ہدایت دی ہے۔

ایران کی انقلابی گارڈز (IRGC) نے ایک بیان میں دعویٰ کیا ہے کہ اُن کے فورسز نے اسرائیل کے کئی اہم فوجی مراکز، فضائی اڈوں اور دیگر ٹھکانوں کو نشانہ بنایا ہے۔ اس کارروائی کو “ٹرُو پرامس 3” کا نام دیا گیا ہے۔ گارڈز کے مطابق، حملے کی مزید تفصیلات جلد فراہم کی جائیں گی۔دوسری جانب اسرائیلی حکام نے تصدیق کی ہے کہ ایران نے اسرائیل پر میزائل داغے ہیں، جنہیں روکنے کے لیے دفاعی نظام متحرک کر دیا گیا ہے۔ عوام کو گھروں میں ہی رہنے کی ہدایت دی گئی ہے۔اسرائیل کی قومی ایمبولینس سروس نے بتایا ہے کہ تل ابیب کے قریبی علاقوں میں کم از کم پانچ افراد زخمی ہوئے ہیں، جنہیں ہسپتال منتقل کر دیا گیا ہے۔
ایرانی سپریم لیڈر آیت اللہ علی خامنہ ای نے کہا ہے کہ ایران، اسرائیل کے حملوں کا سخت جواب دے گا۔ یاد رہے کہ اس سے قبل اسرائیلی کارروائی میں ایران کے انقلابی گارڈز کے کمانڈر حسین سلامی اور چند نیوکلیئر سائنسدانوں کے ہلاک ہونے کی اطلاعات تھیں۔