راہل گاندھی نے ’ڈبل انجن ایم پی‘ تھیوری دی

راہل گاندھی نے رائے بریلی میں کہا کہ یہ حلقہ واحد ہے جہاں دو ممبر پارلیمنٹ ہیں، ایک وہ خود ہیں اور ایک پرینکا گاندھی ہیں۔ انھوں نے عوام سے کہا کہ پرینکا کو بھی یہاں بلایا جائے کیوں کہ یہ سیاسی نہیں، بلکہ ایک خاندانی رشتہ ہے۔

ملک میں ہونے والے انتخابات میں ایک لفظ اکثر گونجتا ہے، “ڈبل انجن”۔ بھارتیہ جنتا پارٹی (بی جے پی) کے رہنما ریاستی انتخابات میں “ڈبل انجن حکومت” کا نعرہ دیتے ہیں۔ دہلی میونسپل انتخابات میں جب دہلی کی حکومت عام آدمی پارٹی کے پاس تھی، تو انھوں نے بھی اپنے انتخابی مہم میں ڈبل انجن کو مرکزی موضوع بنایا تھا۔ لیکن اب پہلی بار ڈبل انجن کا استعمال حکومت کے لیے نہیں بلکہ ایک ممبر پارلیمنٹ کے لیے کیا گیا ہے۔

راہل گاندھی نے اپنی “ٹو ایم پی تھیوری” پیش کی ہے جس کے بعد ڈبل انجن ایم پی کی بحث شروع ہو گئی ہے۔ وہ گزشتہ دنوں اپنے پارلیمانی علاقے رائے بریلی کے اونچاہار میں ایک پروگرام میں شامل ہوئے۔ راہل گاندھی نے کہا کہ رائے بریلی ایک ایسا انتخابی حلقہ ہے جہاں شاید پورے ہندوستان میں دو ممبر پارلیمنٹ ہیں، ایک وہ خود ہیں اور ایک ان کی بہن پرینکا گاندھی ہیں۔ انھوں نے کہا کہ آپ کو پرینکا کو بھی یہاں بلانا چاہیے۔

راہل گاندھی نے رائے بریلی کے عوام اور پارٹی کارکنوں کا شکریہ ادا کیا اور کہا کہ وہ ہمیشہ رائے بریلی کے عوام کی خدمت کے لیے تیار ہیں۔ ان کا کہنا تھا کہ یہ سیاسی نہیں بلکہ ایک خاندان کا رشتہ ہے۔