آر جے ڈی لیڈر کے بیان پر بہار میں سیاسی ہلچل

آر جے ڈی رہنما سنیل سنگھ کے متنازع بیان پر بہار پولیس نے ایف آئی آر کا حکم دیا، سیاسی ماحول گرم۔

پٹنہ ۔ راشٹریہ جنتا دل (آر جے ڈی) کے رہنما سنیل سنگھ کے ایک متنازع بیان کے بعد بہار میں ان کے خلاف ایف آئی آر درج کرنے کے احکامات جاری کر دیے گئے ہیں۔ ان کا یہ بیان حالیہ دنوں میں جاری انتخابی ماحول میں خاصی ہلچل کا سبب بنا ہے۔سنیل سنگھ نے ایک میڈیا انٹرویو میں الزام لگایا کہ سال 2020 کے بہار اسمبلی انتخابات کے دوران آر جے ڈی کے کئی امیدواروں کو ’’جان بوجھ کر‘‘ ہروایا گیا تھا۔ انہوں نے کہا کہ اس وقت ووٹوں کی گنتی کے دوران جانبداری برتی گئی، جس کے باعث کئی امیدوار اپنی جیتی ہوئی نشستیں ہار گئے۔انہوں نے خبر رساں ادارے اے این آئی سے گفتگو میں کہا:
’’میں ووٹوں کی گنتی کے عمل میں شامل تمام افسران سے اپیل کرتا ہوں کہ جسے عوام نے ووٹ دے کر جتایا ہے، اسے ہرانے کی کوشش نہ کریں۔ اگر آپ ایسا کریں گے تو وہی مناظر بہار کی سڑکوں پر دیکھنے کو ملیں گے جو نیپال، بنگلہ دیش اور سری لنکا میں دیکھے گئے۔‘‘
سنیل سنگھ نے مزید کہا کہ افسران کو کسی کے کہنے پر گمراہ نہیں ہونا چاہیے۔ ان کے الفاظ میں:
’’آپ سب کے بھی خاندان ہیں، بچے ہیں، رشتے دار ہیں۔ اس لیے وہی بڑی غلطی مت دہرائیں جو کچھ افسران نے 2020 میں کی تھی۔‘‘
ان کے اس بیان کے فوراً بعد بہار کے پولیس ڈائریکٹر جنرل (ڈی جی پی) وِنے کمار نے ردعمل ظاہر کرتے ہوئے کہا کہ یہ ’’غیر ذمے دارانہ اور اشتعال انگیز بیان‘‘ ہے۔ انہوں نے واضح کیا کہ اس پر ایف آئی آر درج کی جا رہی ہے۔ڈی جی پی وِنے کمار کے مطابق:
’’ایسا بیان ناقابل قبول ہے۔ ووٹنگ کا عمل ختم ہو چکا ہے، اور گنتی کا مرحلہ مکمل طور پر شفاف طریقے سے انجام دیا جائے گا۔‘‘
بہار میں حالیہ انتخابات دو مرحلوں میں مکمل ہوئے ہیں، اور 14 نومبریعنی کل کی صبح آٹھ بجے ووٹوں کی گنتی شروع ہونے والی ہے۔ انتخابی کمیشن نے یقین دلایا ہے کہ نتائج شفاف اور غیرجانبدارانہ ہوں گے، اور کسی قسم کے دباؤ یا بے ضابطگی کی اجازت نہیں دی جائے گی۔سیاسی مبصرین کے مطابق سنیل سنگھ کے بیان نے انتخابی ماحول میں گرمی پیدا کر دی ہے۔ آر جے ڈی کے اندرونی حلقوں کا کہنا ہے کہ سنیل سنگھ نے اپنی ذاتی رائے ظاہر کی، پارٹی کی سرکاری پالیسی نہیں۔ تاہم حکومتی جماعت کے ترجمانوں نے اس بیان کو ’’انتخابی عمل کو متاثر کرنے کی کوشش‘‘ قرار دیا ہے۔بعض سیاسی تجزیہ کاروں کا خیال ہے کہ اس واقعے کے بعد بہار میں انتخابی ضابطہ اخلاق پر عمل درآمد مزید سخت کر دیا جائے گا، تاکہ کسی بھی امیدوار یا سیاسی جماعت کو اشتعال انگیزی کے ذریعے عوامی فضا خراب کرنے کا موقع نہ ملے۔
انتخابی کمیشن کے مطابق تمام ووٹنگ مشینیں (EVMs) سخت سیکیورٹی میں محفوظ ہیں اور گنتی کے دن میڈیا، مبصرین اور سیاسی پارٹیوں کے نمائندے موقع پر موجود رہیں گے۔اس پیش رفت نے بہار کے سیاسی منظرنامے کو ایک مرتبہ پھر تنازع اور کشیدگی کی فضا میں ڈال دیا ہے۔ اب سب کی نظریں 14کل نومبر کی گنتی اور اس کے نتائج پر مرکوز ہیں، جن سے ریاست کی آئندہ سیاسی سمت کا تعین ہوگا۔