نتیش کمار کا اسمبلی خطاب: ترقی، بہالی، بنیادی ڈھانچہ اور تعاون

نتیش کمار نے اسمبلی میں ترقی، قانون و نظم، تعلیمی بھرتیوں، طبی منصوبوں، روزگار، خواتین اسکیموں اور مرکز کے تعاون پر زور دیا۔

بہاراسمبلی کے اجلاس میں وزیراعلیٰ نتیش کمار نے تقریباً بائیس منٹ طویل خطاب کیا جس میں انہوں نے اپنی حکومت کے بیس سالہ سفر اور مختلف شعبوں میں ہونے والی پیش رفت کا تفصیلی ذکر کیا۔ نتیش کمار کا کہنا تھا کہ نومبر 2005 میں این ڈی اے حکومت کے قیام کے بعد ریاست میں قانون کی حکمرانی کو مضبوط بنیاد ملی، اور اسی کے نتیجے میں ترقی کے دروازے کھلے۔ انہوں نے کہا کہ عوام کے تعاون اور انتخابی عمل میں بھرپور شرکت نے حکومت کو مضبوط بنایا، جس سے ترقیاتی منصوبوں کو عملی جامہ پہنانا ممکن ہوا۔ وزیراعلیٰ کے مطابق، تعلیم اور صحت وہ دو بنیادی شعبے ہیں جن پر سب سے زیادہ توجہ دی گئی، اور انہی پر سرمایہ کاری کے بہتر نتائج آج سامنے آ رہے ہیں۔
اپنے خطاب میں نتیش کمار نے سرکاری بھرتیوں اور بنیادی ڈھانچے کے منصوبوں کا بھی خصوصی تذکرہ کیا۔ انہوں نے بتایا کہ بی پی ایس سی کے ذریعے دو لاکھ اٹھاون ہزار اساتذہ کی تقرری عمل میں لائی جا چکی ہے، جبکہ بقیہ ستتر ہزار اساتذہ کے انتخاب کے بعد ریاست میں سرکاری اساتذہ کی کُل تعداد پانچ لاکھ بیس ہزار تک پہنچ جائے گی۔ انہوں نے دعویٰ کیا کہ 27 اضلاع میں نئے میڈیکل کالج تیزی سے تعمیر کیے جا رہے ہیں، پی ایم سی ایچ کو ساڑھے پانچ ہزار بستروں کے ایک بڑے طبی ادارے کی شکل دی جا رہی ہے، اور آئی جی آئی ایم ایس میں تین ہزار بستروں کی توسیع جاری ہے۔ نتیش کمار نے اس بات پر بھی زور دیا کہ ریاست کے کسی بھی حصے سے محض پانچ گھنٹے میں پٹنہ پہنچنے کا ہدف پورا ہو چکا ہے، جبکہ زراعت، مچھلی پروری، روزگار اور خواتین کی خود کفالت جیسے شعبوں میں نمایاں کامیابیاں حاصل ہوئی ہیں۔
وزیراعلیٰ نے کہا کہ ریاست میں خواتین پولیس اہلکاروں کا تناسب ملک میں سب سے زیادہ ہے، اور ’وزیراعلیٰ خواتین روزگار اسکیم‘ کے تحت ایک کروڑ چھپن لاکھ خواتین کو مالی امداد فراہم کی گئی ہے۔ انہوں نے اعلان کیا کہ گھریلو صارفین کو مفت بجلی دینے پر غور کیا جا رہا ہے اور گھروں پر شمسی توانائی کے نظام لگانے کا سلسلہ بھی آگے بڑھ رہا ہے۔ مسلم کمیونٹی کی ترقی، مدارس کی سرکاری منظوری اور دیگر فلاحی اقدامات کا ذکر کرتے ہوئے نتیش کمار نے کہا کہ مرکز کی جانب سے ملنے والا تعاون قابلِ ستائش ہے اور آنے والے پانچ برسوں میں صنعتی اور شہری ترقی کو نئی رفتار دی جائے گی۔ خطاب کے دوران اپوزیشن کی جانب سے مداخلت ہوئی تو وزیراعلیٰ نے دو ٹوک انداز میں کہا کہ پہلے وہ ان کی بات بڑے سکون سے سنا کرتے تھے، مگر اب وہ دوبارہ کسی ایسی سیاسی شراکت کا حصہ نہیں بنیں گے۔