نیتن یاہو کا اعلان:غزہ پر مکمل کنٹرول تک جنگ جاری رہے گی

اسرائیلی وزیر اعظم نیتن یاہو نے کہا ہے کہ غزہ پر مکمل سیکیورٹی کنٹرول تک جنگ جاری رہے گی، حماس کو شکست دی جائے گی اور امدادی سرگرمیوں کے لیے مخصوص منصوبہ نافذ کیا جائے گا۔

اسرائیلی وزیر اعظم بنیامن نیتن یاہو نے ایک تازہ بیان میں واضح کیا ہے کہ غزہ کی پٹی مکمل طور پر اسرائیلی سیکیورٹی کے دائرہ اختیار میں لائی جائے گی اور جب تک ایسا نہیں ہوتا، فوجی آپریشن جاری رہے گا۔ ان کا کہنا تھا کہ اسرائیل کی حتمی حکمتِ عملی حماس کی مکمل شکست پر مبنی ہے۔اپنے خطاب میں نیتن یاہو نے ایک تین نکاتی امدادی منصوبہ بھی پیش کیا جس کے تحت غزہ میں بنیادی ضروریات کی اشیاء پہنچانے، خوراک کی تقسیم کے امریکی زیرِ انتظام مراکز کے قیام اور ایک محفوظ زون کی تشکیل جیسے اقدامات شامل ہیں۔ ان مراکز کو اسرائیلی افواج کی مکمل سیکیورٹی حاصل ہو گی تاکہ امدادی کام بلا تعطل جاری رہیں۔
یہ اعلان ایسے وقت سامنے آیا ہے جب اسرائیل پر عالمی سطح پر دباؤ میں اضافہ ہو رہا ہے کہ وہ غزہ میں جاری فوجی کارروائیاں روکے اور متاثرہ شہریوں تک انسانی امداد کی رسائی ممکن بنائے۔