ممبئی ٹرین حادثہ: راہل گاندھی کا شدید ردعمل،ریلوے نظام پر سخت تنقید

ممبئی کے قریب چلتی ٹرین سے گر کر 6 مسافروں کی ہلاکت پر راہل گاندھی نے مرکزی حکومت پر ریلوے کی بدانتظامی کا الزام لگاتے ہوئے ‘تشہیر پر توجہ اور بنیادی مسائل سے غفلت’ کو تنقید کا نشانہ بنایا۔

ممبرا ریلوے اسٹیشن کے قریب ایک افسوسناک حادثے میں چلتی ٹرین سے گرنے کے سبب چھ مسافر اپنی جان سے ہاتھ دھو بیٹھے۔ یہ واقعہ اس وقت پیش آیا جب مسافر ممبئی سے لکھنؤ جانے والی پشپک ایکسپریس میں سوار تھے۔ حادثے کے فوراً بعد ملک بھر میں افسوس کی لہر دوڑ گئی۔اس سانحے پر اپوزیشن لیڈر راہل گاندھی نے سوشل میڈیا پلیٹ فارم ’ایکس‘ پر سخت ردعمل کا اظہار کیا۔ انھوں نے لکھا کہ جب مرکزی حکومت اپنی 11 سالہ کارکردگی کا جشن منانے میں مصروف ہے، تب ملک کی اصل حالت ممبئی کے اس دل دہلا دینے والے حادثے سے ظاہر ہوتی ہے۔
راہل کا کہنا تھا کہ ’’ریلوے، جو کبھی ہندوستان کے عوام کی زندگی کا سہارا تھی، آج بدنظمی، بھیڑ اور عدم تحفظ کی علامت بن چکی ہے۔‘‘ انھوں نے الزام لگایا کہ مودی حکومت نے گزشتہ گیارہ برسوں میں صرف تشہیر کی، کوئی بنیادی تبدیلی یا جوابدہی نہیں دکھائی گئی۔راہل نے طنزیہ انداز میں کہا کہ حکومت 2025 کی بجائے اب 2047 کے خواب بیچنے میں مصروف ہے، لیکن موجودہ مسائل سے نظریں چرا رہی ہے۔ انھوں نے جاں بحق افراد کے اہل خانہ سے دلی ہمدردی کا اظہار کرتے ہوئے زخمیوں کی جلد صحت یابی کی دعا بھی کی۔
ریلوے حکام کے مطابق حادثہ دیوا اور کوپر اسٹیشن کے درمیان پیش آیا۔ متاثرہ مسافر سی ایس ایم ٹی کی جانب سفر کر رہے تھے جب وہ اچانک چلتی ٹرین سے گر گئے۔ حادثے کے اسباب کی مکمل جانچ جاری ہے۔