انڈین آئڈل سیزن 15 کا تاج مانسی گھوش کے سر

انڈین آئڈل 15 کی ونر مانسی گھوش قرار پائیں، جب کہ سنےہا شنکر کو ٹی-سیریز سے گلوکاری کا بڑا کنٹریکٹ مل گیا۔

معروف گلوکاری شو “انڈین آئڈل” کے 15ویں سیزن کا شاندار فائنل 6 اپریل 2025 کو ہوا، جس میں مغربی بنگال سے تعلق رکھنے والی 24 سالہ مانسی گھوش نے شاندار پرفارمنس دے کر ٹائٹل اپنے نام کیا۔ مانسی کو نہ صرف ٹرافی ملی بلکہ 15 لاکھ روپے کی انعامی رقم بھی دی گئی۔اس سیزن کو مشہور سنگرز اور موسیقاروں، یعنی شویا گھوشال، بادشاہ اور وِشال دادلانی نے جج کیا، جب کہ شو کی میزبانی ایک بار پھر گلوکار آدتیہ نارائن نے کی۔ فائنل کا تھیم “دی گریٹسٹ 90s نائٹ” تھا، جس میں مشہور فلمی ستارے جیسے میکا سنگھ، شلپا شیٹّی اور روینہ ٹنڈن بھی مہمان بن کر آئے اور اسٹیج پر نوے کی دہائی کی یادیں تازہ کی گئیں۔
ٹاپ فائنلسٹس میں سنےہا شنکر، سُبھجیت چکرورتی، انیردھ سُسورم، پریانشو دتہ، چیتنیا دیوَدھے اور مانسی گھوش شامل تھے۔ اگرچہ سنےہا ونر نہیں بن سکیں، مگر ان کے لیے یہ شو کسی خواب کی تعبیر ثابت ہوا۔ 19 سالہ سنےہا کو ٹی-سیریز کی طرف سے ایک بڑا گلوکاری کنٹریکٹ ملا ہے، جو ان کے کیریئر کو نئی راہوں پر لے جا سکتا ہے۔پہلے فائنل کی تاریخ 30 مارچ مقرر تھی، مگر بعد میں اسے ایک ہفتہ آگے بڑھا کر 6 اپریل کر دیا گیا۔ اس پورے سیزن نے ناظرین کو خوب محظوظ کیا اور موسیقی کے شوقین افراد کے لیے ایک یادگار تجربہ ثابت ہوا۔