ایران میں اسرائیلی حملے: اوین جیل اور جوہری مرکز نشانے پر

اسرائیل نے تہران میں اوین جیل اور فردو جوہری مرکز پر حملے کیے،ایرانی حکام نے نقصان کی تصدیق کی مگر حالات کو قابو میں قرار دیا۔

حالیہ بیانات میں اسرائیلی وزیرِ دفاع یواو گیلنٹ نے دعویٰ کیا ہے کہ اسرائیلی افواج نے ایران کے دارالحکومت تہران میں واقع اوین جیل اور بسیج فورس کے ایک مرکز کو نشانہ بنایا ہے۔ ان کے مطابق اوین جیل میں حکومت مخالف افراد اور سیاسی قیدیوں کو قید رکھا جاتا ہے۔ادھر، ایک بین الاقوامی میڈیا ادارے کے پاس دستیاب سی سی ٹی وی فوٹیج میں جیل کے مرکزی دروازے کے نزدیک دھماکے کے مناظر دیکھے جا سکتے ہیں۔ ایرانی نیم سرکاری خبر رساں ادارے “فارس” نے بھی رپورٹ کیا ہے کہ یہ حملہ غالباً کسی ڈرون یا بارودی مواد کے ذریعے کیا گیا۔
ایرانی عدلیہ نے جیل پر حملے اور ہونے والے نقصان کی تصدیق کی ہے، تاہم حکام کا کہنا ہے کہ حالات قابو میں ہیں۔اس کے علاوہ، ایرانی میڈیا پر نشر ہونے والے مختلف حکومتی ذرائع نے بتایا ہے کہ اسرائیل نے قُم کے علاقے میں واقع فردو کے جوہری تنصیب کو بھی نشانہ بنایا ہے، جو زیرِ زمین قائم ہے۔ تنسیم اور ارنا نیوز ایجنسی کے مطابق حملے کے باوجود عوام کے لیے فی الحال کوئی خطرہ لاحق نہیں۔یاد رہے کہ امریکہ کی ایئر فورس بھی فردو کے اسی نیوکلیئر کمپلیکس کو مخصوص گہرائی تک مار کرنے والے بموں کے ذریعے ہدف بنا چکی ہے۔