ایران کی امریکہ کو سخت وارننگ، کشیدگی میں مزید اضافہ متوقع
ایران نے امریکہ کو سخت وارننگ دیتے ہوئے کہا ردعمل وسیع ہوگا، حملوں کے بعد خطے میں کشیدگی ۔
ایران کے اسلامی انقلابی گارڈ کور (آئی آر جی سی) نے ایک تازہ بیان میں کہا ہے کہ اس نے اب تک امریکہ اور اس کے علاقائی اتحادیوں کے خلاف خاصا تحمل اور احتیاط کا مظاہرہ کیا ہے، خاص طور پر اپنے ردعمل کے لیے اہداف کے انتخاب میں۔ تاہم تنظیم نے واضح کیا ہے کہ آئندہ اس طرح کی پابندیوں کو برقرار نہیں رکھا جائے گا۔ایرانی سرکاری میڈیا پر جاری کیے گئے بیان کے مطابق آئی آر جی سی نے خبردار کیا کہ اگر امریکی افواج نے اپنی حدود سے تجاوز کیا تو ایران کا ردعمل نہ صرف خطے تک محدود نہیں رہے گا بلکہ اس کا دائرہ اس سے بھی آگے تک پھیل سکتا ہے۔ بیان میں مزید کہا گیا کہ ایران امریکہ اور اس کے اتحادیوں کے بنیادی ڈھانچے کو نشانہ بنا سکتا ہے اور خطے میں تیل اور گیس کی ترسیل کو طویل عرصے تک متاثر کر سکتا ہے
یہ بیان ایسے وقت میں سامنے آیا ہے جب حالیہ دنوں میں ایران کے مختلف مقامات کو حملوں کا نشانہ بنایا گیا ہے۔ ان حملوں میں خلیج فارس میں واقع اہم جزیرہ خارگ، مختلف دریاؤں پر قائم پل، بجلی پیدا کرنے والے مراکز اور دیگر تنصیبات شامل ہیں۔ ان واقعات نے خطے میں پہلے سے موجود کشیدگی کو مزید بڑھا دیا ہے۔ایران کی سرکاری خبر رساں ایجنسی ارنا کے مطابق حال ہی میں کاشان شہر میں ایک پل پر حملہ کیا گیا، جس کے نتیجے میں دو افراد ہلاک جبکہ تین دیگر زخمی ہوئے ہیں۔ تاہم ان دعوؤں کی آزاد ذرائع سے تصدیق تاحال ممکن نہیں ہو سکی ہے۔
دوسری جانب امریکی صدر ڈونلڈ ٹرمپ نے بھی سوشل میڈیا پلیٹ فارم ٹروتھ سوشل پر ایک سخت بیان جاری کیا ہے۔ انہوں نے خبردار کیا ہے کہ اگر ایران نے امریکہ کے ساتھ کسی معاہدے کی طرف پیش رفت نہ کی تو اس کے نتائج انتہائی سنگین ہو سکتے ہیں، حتیٰ کہ انہوں نے پوری دنیا کے لیے تباہ کن انجام کی بات بھی کی ہے۔مجموعی طور پر یہ صورتحال مشرق وسطیٰ میں روز بروزبڑھتی ہوئی کشیدگی کی عکاسی کرتی ہے، جہاں بیانات اور ممکنہ اقدامات خطے کے امن اور عالمی توانائی کی فراہمی دونوں پر گہرے اثرات مرتب کر سکتے ہیں۔
