انڈیا نے پاکستانی حملوں سے نقصان کے دعوے جھوٹ قرار دیے

انڈیا نے پاکستانی حملوں میں فوجی تنصیبات کو بڑے پیمانے پر نقصان پہنچنے کے دعووں کو بے بنیاد قرار دیتے ہوئے کہا ہے کہ تمام دراندازیوں کا مؤثر جواب دیا گیا۔

نئی دہلی میں ایک اہم پریس کانفرنس سے خطاب کرتے ہوئے وزارت دفاع اور وزارت خارجہ کے اعلیٰ حکام نے پاکستان کی جانب سے کیے گئے حالیہ حملوں اور دعوؤں کو گمراہ کن اور بے بنیاد قرار دیا۔ انڈین فضائیہ کی ونگ کمانڈر ویومیکا سنگھ نے واضح کیا کہ پاکستانی میڈیا اور سوشل پلیٹ فارمز پر انڈین دفاعی تنصیبات کو پہنچنے والے مبینہ نقصان کے جو دعوے سامنے آئے ہیں، وہ سراسر غلط اور بدنیتی پر مبنی پروپیگنڈا کا حصہ ہیں۔ونگ کمانڈر نے کہا کہ “پاکستان نے یہ تاثر دینے کی کوشش کی کہ آدم پور میں جدید ایس-400 میزائل نظام کو نقصان پہنچا ہے یا سورت اور سرسا میں ایئر بیسز تباہ ہوئے ہیں، جب کہ زمینی حقیقت اس کے برعکس ہے۔ اسی طرح نگروٹا میں برہموس سسٹم، چندی گڑھ اور ڈیرنگیاری میں توپ خانے کی پوزیشنز اور اسلحہ ڈپو کے بارے میں بھی جھوٹے دعوے کیے گئے، جن میں کوئی صداقت نہیں۔”
وزارت خارجہ کے سیکریٹری جناب وکرم مصری نے بھی ان خیالات کی تائید کرتے ہوئے کہا کہ پاکستان کی حالیہ حرکات خطے میں امن و امان کو متاثر کرنے کی دانستہ کوشش ہیں۔ ان کے بقول، “ہم نے ایک بار پھر دیکھا کہ پاکستان نے اشتعال انگیزی کا مظاہرہ کیا، جس کے جواب میں انڈین افواج نے انتہائی ذمہ داری اور احتیاط کے ساتھ دفاعی اقدامات کیے۔”
انڈین افواج نے یہ بھی انکشاف کیا کہ پاکستانی فوج کی نقل و حرکت سے واضح ہے کہ وہ سرحدی علاقوں میں کشیدگی کو بڑھانا چاہتی ہے۔ “ہماری مسلح افواج نے تمام حملوں کا مؤثر اور حکمت عملی کے تحت جواب دیا، اور امن قائم رکھنے کے اپنے عزم کا اعادہ کیا،” کرنل صوفیہ نے بتایا۔کرنل صوفیہ کے مطابق، پاکستان نے مغربی محاذ پر ہائی سپیڈ میزائلوں، یو-کیب ڈرونز، جنگی طیاروں اور دیگر جدید ہتھیاروں کا استعمال کرتے ہوئے متعدد مقامات پر حملے کیے، جنہیں زیادہ تر ناکام بنا دیا گیا۔ “پاکستان کی جانب سے سرینگر سے نلیا تک ایل او سی اور بین الاقوامی سرحد پر 26 سے زائد مقامات پر فضائی خلاف ورزیاں کی گئیں، جنھیں بروقت کارروائی کرتے ہوئے ناکام بنایا گیا،” انھوں نے کہا۔
کرنل صوفیہ نے مزید بتایا کہ “ادھم پور، پٹھان کوٹ، آدم پور، بھج اور بھٹنڈا جیسے اہم ایئر اسٹیشنز پر کچھ حد تک نقصان ضرور ہوا، لیکن اہم عسکری صلاحیتوں پر کوئی اثر نہیں پڑا۔ پاکستان نے پنجاب میں ایک ایئر بیس کو رات ایک بج کر 40 منٹ پر نشانہ بنانے کی کوشش کی، لیکن انڈین ایئر ڈیفنس نے فوری ردعمل دیتے ہوئے صورتحال پر قابو پایا۔”انھوں نے یہ بھی کہا کہ “قابل مذمت طور پر پاکستان نے سرینگر، اونتی پور اور ادھم پور میں موجود ہیلتھ سینٹرز اور تعلیمی اداروں کو بھی نشانہ بنایا، جو نہ صرف جنگی ضابطوں کی خلاف ورزی ہے بلکہ عالمی قوانین کی کھلی خلاف ورزی بھی ہے۔”
انڈین حکام نے واضح کیا ہے کہ بھارتی افواج مکمل چوکسی کے ساتھ حالات کا سامنا کر رہی ہیں اور کسی بھی قسم کی جارحیت کا منہ توڑ جواب دینے کے لیے تیار ہیں، جبکہ امن قائم رکھنے کے اصولی مؤقف پر بدستور قائم ہیں۔