ایتھوپیامیں ہیلی گبی آتش فشاں کے پھٹنے کااثر بھارتی فضائی شعبے پر

ایتھوپیا میں ہیلی گبی آتش فشاں پھٹنے کے بعد ایئر انڈیا نے گیارہ بین الاقوامی اور ملکی پروازیں منسوخ کر دیں۔

ایتھوپیا میں واقع ہیلی گبی آتش فشاں کے اچانک پھٹنے کے اثرات بھارتی فضائی شعبے پر بھی نظر آ رہے ہیں۔ اس واقعے کے سبب ایئر انڈیا نے اپنی گیارہ بین الاقوامی اور ملکی پروازیں وقتی طور پر منسوخ کر دی ہیں۔ ایئر لائن کے مطابق یہ اقدام اس لیے ضروری تھا کیونکہ آتش فشاں کے دھوئیں اور لاوے کے اثرات سے گزرنے والے ہوائی جہازوں کی محتاط جانچ کی جا رہی ہے تاکہ مسافروں اور عملے کی حفاظت یقینی بنائی جا سکے۔ایئر انڈیا نے اپنے سوشل میڈیا اکاؤنٹ پر بتایا کہ اس وقت ہوائی جہازوں کی مکمل جانچ پڑتال کی جا رہی ہے، اور تمام متاثرہ پروازوں کے مسافروں کو اپ ڈیٹ فراہم کی جا رہی ہے۔ کمپنی کے مطابق، زمین پر موجود ٹیمیں مسافروں کو ان کی پرواز کی موجودہ صورتحال سے آگاہ کر رہی ہیں اور جہاں ضروری ہو، انہیں ہوٹل میں قیام اور دیگر سہولیات فراہم کی جا رہی ہیں۔ ایئر لائن نے یقین دہانی کرائی ہے کہ وہ جلد از جلد متاثرہ مسافروں کے لیے متبادل پروازوں کا انتظام کر رہی ہے تاکہ سفر میں تاخیر کم سے کم ہو۔
ایئر انڈیا نے اس غیر متوقع صورتحال کے باعث مسافروں کو ہونے والی پریشانی پر افسوس ظاہر کیا اور کہا کہ مسافروں اور کریو کی حفاظت اس کی اولین ترجیح ہے۔منسوخ شدہ پروازوں میں کئی اہم بین الاقوامی روٹس شامل ہیں، جن میں نیویارک۔دہلی (AI 106)، نیویارک (JFK)۔دہلی (AI 102)، دبئی۔حیدرآباد (AI 2204)، دوحہ۔ممبئی (AI 2290)، دبئی۔چنئی (AI 2212)، دمام۔ممبئی (AI 2250) اور دوحہ۔دہلی (AI 2284) شامل ہیں۔
ملکی پروازوں میں بھی متعدد اہم روٹس متاثر ہوئے ہیں، جیسے چنئی،ممبئی (AI 2822)، حیدرآباد۔دہلی (AI 2466)، ممبئی۔حیدرآباد۔ممبئی (AI 2444/2445) اور ممبئی۔کلکتہ۔ممبئی (AI 2471/2472)۔ایئر لائن کے ترجمان نے واضح کیا کہ یہ عارضی اقدامات مکمل حفاظتی جائزے کے تحت کیے جا رہے ہیں، اور امید ہے کہ حالات جلد معمول پر آجائیں گے۔ مسافروں کو ہدایت دی گئی ہے کہ وہ اپنی پرواز کی صورتحال کے بارے میں ایئر انڈیا کی ویب سائٹ یا کسٹمر سروس سے معلومات حاصل کرتے رہیں۔