سونا 1 لاکھ روپے فی 10 گرام کی تاریخی سطح پر پہنچ گیا

عالمی غیر یقینی صورتحال کے باعث بھارت میں سونے کی قیمت 1 لاکھ روپے فی 10 گرام کی ریکارڈ سطح پر پہنچ گئی، صرف اپریل میں 9,000 روپے کا اضافہ ہوا۔

نئی دہلی:بین الاقوامی سطح پر بڑھتی غیر یقینی صورت حال اور معاشی دباؤ کے باعث سونے کی قیمتیں تیزی سے نئی بلندیوں کو چھو رہی ہیں۔ بھارت میں 24 کیرٹ سونے کی قیمت پہلی بار 10 گرام کے لیے 1,00,000 روپے تک جا پہنچی ہے۔ انڈیا بلین اینڈ جیولرز ایسوسی ایشن (IBJA) کے مطابق، گزشتہ دنوں میں سونے کی قیمت میں 3,300 روپے فی 10 گرام کا نمایاں اضافہ ہوا ہے۔دیگر کیرٹ کی قیمتوں میں بھی نمایاں اضافہ دیکھا گیا ہے، جیسے کہ 22 کیرٹ کا ریٹ 97,600 روپے، 20 کیرٹ 89,000 روپے، اور 18 کیرٹ سونا 81,000 روپے فی 10 گرام تک پہنچ چکا ہے۔
ملٹی کموڈٹی ایکسچینج (MCX) پر بھی سونے کی قیمتوں نے نیا ریکارڈ قائم کیا ہے، جہاں جون فیوچرز کا ریٹ 99,178 روپے فی 10 گرام تک پہنچ گیا۔ اب یہ تاریخی 1 لاکھ روپے کی سطح سے صرف 833 روپے دور ہے۔فزیکل مارکیٹ میں بھی سونے کے دام، جی ایس ٹی شامل کرنے کے بعد، ایک لاکھ روپے سے تجاوز کر چکے ہیں۔ بین الاقوامی سطح پر بھی سونے نے اپنی قیمتوں کے تمام سابقہ ریکارڈ توڑ دیے ہیں، جہاں کامیکس پر سونا 3,504.12 امریکی ڈالر فی اونس پر ٹریڈ کر رہا ہے۔
سونے کی مانگ میں اضافے کی اہم وجہ عالمی اقتصادی غیر یقینی صورت حال، امریکی ڈالر کی کمزوری، اور تجارتی کشیدگی ہے، خاص طور پر امریکہ اور چین کے درمیان۔ سرمایہ کار محفوظ سرمایہ کاری کے طور پر سونے کی طرف رجوع کر رہے ہیں۔سال 2025 کے آغاز سے اب تک سونے کی قیمت میں تقریباً 23 ہزار روپے کا اضافہ ہوا ہے، جو کہ 30 فیصد سے زیادہ کا ریٹرن بنتا ہے۔ صرف اپریل میں ہی سونا 9,000 روپے مہنگا ہوا ہے۔
چاندی کی قیمتوں میں بھی اضافہ دیکھا جا رہا ہے، جو کہ 95,850 روپے فی کلو سے اوپر ٹریڈ کر رہی ہے، اور یہ بھی اپنے آل ٹائم ہائی کے قریب ہے۔سرمایہ کاری کے حوالے سے ماہرین کا کہنا ہے کہ طویل المدتی سرمایہ کاروں کے لیے یہ ایک بہتر موقع ہو سکتا ہے، لیکن قلیل مدتی سرمایہ کاروں کو احتیاط سے کام لینا چاہیے کیونکہ قیمتوں میں فوری منافع خوری کا رجحان آ سکتا ہے۔