منشیات کی ملکہ کُسُم کی 4 کروڑ کی جائیداد ضبط،پولیس کا بڑا ایکشن
دہلی پولیس نے منشیات فروش کُسُم کی 4 کروڑ کی غیر قانونی جائیداد ضبط کر لی، ملزمہ فرار ہے اور متعدد کیسز میں مطلوب ہے۔
دہلی پولیس نے شمال مغربی دہلی کے سلطان پوری علاقے میں منشیات فروشی میں ملوث ایک خاتون، کُسُم، کی تقریباً چار کروڑ روپے مالیت کی جائیداد ضبط کر لی ہے۔ پولیس کے مطابق، یہ تمام جائیدادیں منشیات کے دھندے سے حاصل کی گئی ناجائز آمدنی سے خریدی گئی تھیں۔ فی الحال کُسُم مفرور ہے اور مارچ میں اس کے گھر پر چھاپے کے بعد سے لاپتہ ہے۔ پولیس نے مجموعی طور پر آٹھ جائیدادیں قبضے میں لی ہیں، جن میں سات سلطان پوری میں اور ایک روہنی سیکٹر 24 میں واقع ہے۔تحقیقات سے معلوم ہوا ہے کہ کُسُم سلطان پوری میں سرگرم ایک بڑے منشیات گروہ کی سرغنہ ہے۔ اس کے خلاف منشیات سے متعلق قانون (NDPS Act) کے تحت اب تک بارہ مقدمات درج ہو چکے ہیں، جو دہلی کے مختلف اضلاع اور کرائم برانچ میں زیر سماعت ہیں۔ مارچ میں جب پولیس کی اینٹی نارکوٹکس ٹیم نے اس کے گھر پر چھاپہ مارا تو اس کا بیٹا، امیت، موقع سے گرفتار ہوا۔ اس کارروائی میں 550 ہیروئن کے پیکٹس، نشہ آور گولیاں (ٹراماڈول)، 14 لاکھ روپے نقدی اور ایک اسکورپیو گاڑی بھی برآمد کی گئی تھی۔
مزید چھان بین کے دوران، پولیس کو معلوم ہوا کہ کُسُم کی دو بیٹیوں کے بینک کھاتوں میں پچھلے ڈیڑھ سال کے دوران دو کروڑ روپے سے زیادہ کی مشتبہ لین دین ہوئی ہے۔ یہ رقم عام طور پر دو ہزار سے پانچ ہزار روپے کے چھوٹے چھوٹے ٹرانزیکشنز میں مختلف اکاؤنٹس کے ذریعے منتقل کی گئی۔ صرف 2024 کے پہلے چھ مہینوں میں ہی 70 لاکھ روپے جمع کیے گئے۔پولیس کو ایک خاص مکان پر شک ہوا جہاں متعدد مشتبہ افراد کی نقل و حرکت دیکھی گئی تھی۔ جانچ کے بعد پتا چلا کہ اس علاقے میں چار گھروں کو اندرونی طور پر جوڑ کر ایک شاندار چار منزلہ عمارت تیار کی گئی تھی، جو باہر سے چار مختلف مکانات نظر آتی ہے لیکن اندر سے ایک مکمل عمارت کی صورت اختیار کر چکی ہے۔ غریب علاقے سلطان پوری میں ایسی ’منی حویلی‘ نے سب کی توجہ حاصل کر لی تھی۔
پولیس نے اس غیرقانونی تعمیر کی اطلاع میونسپل کارپوریشن (MCD) کو دے دی ہے اور عمارت کو گرا دینے کی سفارش کی ہے۔ اس پوری کارروائی کی تصدیق ڈی سی پی بیرونی دہلی، سچن شرما نے کی ہے، جن کا کہنا ہے کہ معاملے کی تفتیش جاری ہے۔ پولیس کا ماننا ہے کہ کُسُم کی جائیداد ضبط ہونے کے بعد اس کے نیٹ ورک کو زبردست نقصان پہنچا ہے۔ اب پولیس کی پوری توجہ کُسُم کی گرفتاری پر مرکوز ہے، جو تاحال مفرور ہے۔
