کنال کامرا پر تنازعہ، شیو سینا کی وارننگ

کنال کامرا کے طنزیہ تبصرے پر مہاراشٹر میں ہنگامہ، شیو سینا کی سخت وارننگ، جبکہ کامرا نے معافی سے انکار کر دیا۔

مہاراشٹر کے ڈپٹی وزیر اعلیٰ ایکناتھ شندے پر کومیڈین کنال کامرا کے طنزیہ تبصرے کے بعد تنازعہ مزید گہرا ہو گیا ہے۔ شیو سینا کے کئی رہنماؤں نے کامرا کو سخت تنبیہہ دی ہے، جب کہ وزیر گلاب رگھوناتھ پاٹل نے کہا ہے کہ اگر کامرا نے معافی نہیں مانگی تو انہیں “اپنے انداز میں” سمجھایا جائے گا۔
ڈپٹی سی ایم ایکناتھ شندے نے ردعمل دیتے ہوئے کہا کہ اظہار رائے کی آزادی سب کو حاصل ہے، لیکن کسی کو بھی حد پار نہیں کرنی چاہیے۔ اس سے پہلے وزیر اعلیٰ دیویندر فڈنویس نے بھی کامرا سے معافی کا مطالبہ کیا تھا اور کہا تھا کہ ایسی حرکتیں برداشت نہیں کی جائیں گی۔
کنال کامرا نے ایکس (سابقہ ٹویٹر) پر واضح کیا کہ وہ معافی نہیں مانگیں گے۔ ان کا کہنا تھا، “مجھے اس بھیڑ سے ڈر نہیں لگتا اور میں چھپ کر انتظار نہیں کروں گا۔” انہوں نے مزید کہا کہ ان کا بیان وہی تھا جو ڈپٹی سی ایم اجیت پوار بھی دے چکے ہیں۔
یہ تنازعہ اس وقت شروع ہوا جب کامرا نے اپنے شو میں ایک مقبول فلمی گانے کے بول بدل کر ایکناتھ شندے کے سیاسی کیریئر پر طنز کیا۔ اس کے بعد مہاراشٹر میں ہنگامہ مچ گیا، شیو سینا کارکنوں نے کامرا کے اسٹوڈیو میں توڑ پھوڑ کی اور انہیں جان سے مارنے کی دھمکیاں بھی دیں۔