بینک اہلکار نے مندر سے چرائے 9 لاکھ، رنگے ہاتھوں پکڑا گیا

متھرا کے بنکے بہاری مندر میں بینک افسر گلّک سے رقم چراتے رنگے ہاتھوں پکڑا گیا، ملزم کے گھر سے مجموعی طور پر 9.5 لاکھ روپے برآمد ہوئے۔

اتر پردیش کے شہر متھرا میں واقع مشہور شری بنکے بہاری مندر سے متعلق ایک حیران کن واقعہ سامنے آیا ہے، جہاں ایک بینک ملازم کو مندر کی گلّک سے رقم چراتے ہوئے رنگے ہاتھوں پکڑا گیا۔پولیس کے مطابق، مذکورہ شخص کا نام ابھینو سکسیَنہ ہے جو کینرا بینک میں فیلڈ آفیسر کی حیثیت سے تعینات ہے۔ معاملہ اس وقت سامنے آیا جب ہفتے کی شام چار بجے کے قریب، مندر کے کنٹرول روم میں موجود اہلکاروں کو مذکورہ ملازم کے مشکوک رویے پر شک ہوا۔ شبہ ہونے پر مندر کے منیجر منیش شرما کو اطلاع دی گئی جنھوں نے فوری طور پر سی سی ٹی وی کیمروں کی ریکارڈنگ چیک کی۔جیسے ہی تلاشی لی گئی، ابھینو کے پاس سے موقع پر ہی تقریباً 1 لاکھ 28 ہزار روپے برآمد ہوئے۔ مزید تفتیش پر، اس نے پہلے بھی کئی بار رقم چرانے کا اعتراف کیا، جس پر پولیس نے اس کے کرائے کے گھر پر چھاپہ مارا اور 8 لاکھ روپے سے زائد نقدی برآمد کر لی۔ اس طرح چوری کی مجموعی رقم تقریباً 9 لاکھ 50 ہزار روپے بنتی ہے۔
معلوم ہوا ہے کہ مندر کی 16 بھینٹ گلّکیں گزشتہ تین دنوں سے ضلعی عدالت کی نگرانی میں کھولی جا رہی تھیں، جس دوران یہ واقعہ پیش آیا۔ مندر کی رقم کی گنتی کے دوران بینک افسر کا کپڑوں میں نوٹ چھپانا سی سی ٹی وی میں ریکارڈ ہو گیا تھا۔
ابھینو سکسیَنہ کی اہلیہ ایک چارٹرڈ اکاؤنٹنٹ ہیں اور یہ جوڑا متھرا کی اشوک سٹی میں کرائے کے مکان میں رہائش پذیر ہے۔ پولیس نے مندر انتظامیہ کی شکایت پر مقدمہ درج کر کے ملزم کو حراست میں لے لیا ہے اور مزید قانونی کارروائی جاری ہے۔