الٰہ آبادہائی کورٹ کامحمدزبیرکوعبوری تحفظ،ایف آئی آرمنسوخی سے انکار

الٰہ آباد ہائی کورٹ نے فیکٹ چیکر محمد زبیر کے خلاف نفرت انگیزی سے متعلق ایف آئی آر منسوخ کرنے سے انکار کیا، مگر انہیں گرفتاری سے عبوری تحفظ فراہم کرتے ہوئے بیرون ملک جانے سے روک دیا۔

الٰہ آباد ہائی کورٹ نے فیکٹ چیکنگ ادارے آلٹ نیوز کے شریک بانی محمد زبیر کی جانب سے دائر اس درخواست کو مسترد کر دیا ہے جس میں ان کے خلاف درج ایف آئی آر کو ختم کرنے کی اپیل کی گئی تھی۔ یہ ایف آئی آر اکتوبر 2024 میں غازی آباد میں درج کی گئی تھی، جس کا تعلق ہندوتوا لیڈر یتی نرسنگھانند کی مبینہ نفرت انگیز تقاریر سے متعلق زبیر کی جانب سے سوشل میڈیا پر کیے گئے تبصروں سے ہے۔جسٹس سدھارتھ ورما اور جسٹس ڈاکٹر یوگیندر کمار سریواستو پر مشتمل بینچ نے فیصلے میں کہا کہ تحقیقات کا عمل مکمل ہونے تک زبیر کو گرفتاری سے تحفظ حاصل رہے گا، لیکن وہ عدالت کی اجازت کے بغیر ملک سے باہر نہیں جا سکیں گے۔
ایف آئی آر میں الزام عائد کیا گیا ہے کہ زبیر نے نرسنگھانند کے اشتعال انگیز بیانات کے ویڈیو کلپس کو 3 اکتوبر 2024 کو سوشل میڈیا پلیٹ فارم “ایکس” پر پوسٹ کیا، جس سے مذہبی جذبات کو ٹھیس پہنچی اور عوامی امن و امان پر منفی اثر پڑا۔ شکایت کنندہ ادیتیہ تیاگی کا دعویٰ ہے کہ ان پوسٹس کی وجہ سے داسنا دیوی مندر (غازی آباد) کے اطراف پرتشدد واقعات پیش آئے۔اتر پردیش حکومت نے عدالت میں ایف آئی آر کا دفاع کرتے ہوئے کہا کہ زبیر نے اپنے فالوورز کے سامنے حالات کو بگاڑنے والا مواد پیش کیا، جو “آدھی سچائیوں” پر مبنی تھا اور اس سے ملک کی یکجہتی اور سالمیت کو خطرہ لاحق ہوا۔
دوسری جانب، زبیر نے مؤقف اپنایا کہ ان کے تبصرے اور پوسٹس ایک صحافی اور فیکٹ چیکر کی حیثیت سے ان کی پیشہ ورانہ ذمہ داری کا حصہ ہیں، جن کا مقصد اشتعال انگیزی کی نشاندہی اور قانون نافذ کرنے والے اداروں کی توجہ مبذول کرانا تھا۔ انھوں نے زور دیا کہ ان کے بیانات آئینی آزادی اظہار کے دائرے میں آتے ہیں اور میڈیا کے دیگر اداروں نے بھی اسی طرح کے مواد کی رپورٹنگ کی تھی۔عدالت نے اپنے فیصلے میں ایف آئی آر کو منسوخ کرنے سے گریز کیا، لیکن زور دیا کہ معاملے کی غیرجانبدار اور مکمل تفتیش ناگزیر ہے۔ عدالت کا یہ اقدام زبیر کو فی الحال حراست سے محفوظ رکھتا ہے، تاہم ان کی نقل و حرکت پر عارضی قدغن عائد کر دی گئی ہے۔