بہار کی سیاست پر پرشانت کشور کا بڑا دعویٰ

پرشانت کشور کا دعویٰ: جے ڈی یو کو 25 سے کم نشستیں، بی جے پی کو نقصان، مہاگٹھ بندھن تیسرے نمبر پر، جن سوراج اکیلا میدان میں۔

بہار کی سیاست میں سرگرم جن سوراج کے بانی پرشانت کشور نے آئندہ اسمبلی انتخابات کے حوالے سے اہم پیش گوئی کی ہے۔ ان کا کہنا ہے کہ اس بار ریاست میں بڑے پیمانے پر سیاسی نقشہ بدلنے والا ہے۔ کشور کے مطابق جنتا دل یونائیٹڈ (جے ڈی یو) کو 25 سے بھی کم نشستیں ملیں گی، بی جے پی کو بھی نقصان اٹھانا پڑے گا اور مہاگٹھ بندھن تیسرے نمبر پر چلا جائے گا۔ ان کے بقول ان کی پارٹی جن سوراج ریاست کی تمام 243 نشستوں پر اپنے امیدوار کھڑا کرے گی اور کسی بھی جماعت سے اتحاد نہیں کرے گی۔ انہوں نے دو ٹوک کہا کہ یہ انتخاب ان کی جماعت کے لیے یا تو ’’اُڑان بھرنے‘‘ کا موقع ہوگا یا پھر ’’زمین پر گرنے‘‘ جیسا۔

اشوک چودھری پر براہِ راست حملہ
پرشانت کشور نے وزیر اشوک چودھری کو ایک بار پھر نشانے پر لیا۔ انہوں نے کہا کہ وہ نوٹس بھیج رہے ہیں لیکن محض نوٹس دینے سے کوئی بری الذمہ نہیں ہو جاتا۔ کشور نے الزام لگایا کہ اشوک چودھری نے 200 کروڑ روپے کے بدعنوانی میں کردار ادا کیا ہے۔ ان کا کہنا تھا کہ اگر انہوں نے زمین خریدی ہے تو یہ اپنے پی اے کے نام پر کیوں خریدی گئی؟ کیا وہ قانون سے بالاتر ہیں کہ ان سے سوال نہ پوچھا جائے؟

نتیش کمار پر تنقید
کشور نے وزیر اعلیٰ نتیش کمار کو بھی کڑی تنقید کا نشانہ بنایا۔ انہوں نے کہا کہ نتیش جی خود کہا کرتے تھے کہ اگر کسی پر الزام لگے تو وضاحت دے کر عہدہ چھوڑ دینا چاہیے، مگر آج وہی اصول اپنانے کو تیار نہیں ہیں۔ ان کے مطابق نتیش ذاتی طور پر بے ایمان نہیں ہیں لیکن ان کے آس پاس موجود لیڈر اور افسران بدعنوانیوں میں ملوث ہیں۔ سوال یہ ہے کہ اگر نتیش بدعنوان نہیں تو ریاست میں لوٹ کھسوٹ کرنے والے آخر کون ہیں؟

انتخابی حکمت عملی اور اتحاد
پرشانت کشور نے کہا کہ وہ چار پانچ دن میں طے کریں گے کہ ذاتی طور پر انتخاب لڑیں گے یا نہیں۔ تاہم انہوں نے واضح کیا کہ ان کا خاندان انتخابی سیاست کا حصہ نہیں بنے گا۔ ان کے مطابق ان کی اہلیہ ڈاکٹر ہیں اور سیاست میں سرگرم نہیں، جبکہ ان کا بیٹا ابھی کم عمر ہے۔ انہوں نے یہ بھی کہا کہ ان کی جماعت کسی بھی سیاسی پارٹی کے ساتھ اتحاد نہیں کرے گی۔

اویسی اور مذہبی سیاست پر تبصرہ
کشور نے اویسی کی پارٹی پر بھی تنقید کی اور کہا کہ وہ مذہب کی بنیاد پر سیاست کرتی ہے، جبکہ جن سوراج اس رجحان سے مکمل طور پر الگ رہے گی۔

خواتین کو 10 ہزار دینے کی اسکیم پر ردعمل
ریاستی حکومت کی خواتین کو 10 ہزار روپے دینے کی اسکیم کو کشور نے مسترد کرتے ہوئے کہا کہ یہ سیدھا سیدھا ’’رشوت‘‘ ہے اور کوئی گیم چینجر نہیں۔ ان کے مطابق حکومت نے بدعنوانی اور جرائم سے سمجھوتہ کر لیا ہے۔ انہوں نے یاد دلایا کہ موجودہ حکومت میں ایسے رہنما شامل ہیں جن پر قتل جیسے سنگین الزامات عائد ہو چکے ہیں۔