ایل پی جی کی کمی پر قابو پانے کے لیے نئے اقدامات

حکومت نے ایل پی جی کی پیداوار بڑھائی، گھریلو اور ضروری اداروں کو ترجیح دی، جمع خوری روکنے کے لیے اقدامات کیے۔

حکومت نے تمام تیل رِفائنریوں کو ہدایت دی ہے کہ وہ ایل پی جی کی پیداوار بڑھائیں اور اضافی پیداوار کو گھریلو استعمال کے لیے فراہم کریں۔ وزارت کے مطابق یہ قدم موجودہ جغرافیائی سیاسی حالات اور ایندھن کی سپلائی میں پیدا ہونے والی رکاوٹوں کی وجہ سے اٹھایا گیا ہے تاکہ صارفین کو ایل پی جی کی کمی کا سامنا نہ کرنا پڑے۔وزارت نے اپنے بیان میں بتایا کہ گھریلو صارفین کو ایل پی جی کی سپلائی کو اولیت دی جائے گی۔ اس کے ساتھ ہی جمع خوری اور کالابازاری کو روکنے کے لیے 25 دن کا انٹر.بکنگ پیریڈ نافذ کیا گیا ہے، تاکہ ہر صارف باقاعدگی سے اور مناسب مقدار میں گیس حاصل کر سکے۔
مزید برآں، وزارت نے بتایا کہ درآمد شدہ ایل پی جی کی غیر گھریلو سپلائی میں بھی اہم شعبوں کو ترجیح دی جا رہی ہے، جیسے ہسپتال اور تعلیمی ادارے۔ اس اقدام کا مقصد یہ ہے کہ ضروری خدمات متاثر نہ ہوں اور صحت و تعلیم کے شعبوں میں تسلسل قائم رہے۔وزارت نے کہا کہ جو ایل پی جی تجارتی استعمال کے لیے درآمد کی جا رہی ہے، اسے سب سے پہلے ان جگہوں پر فراہم کیا جائے گا جہاں سب سے زیادہ ضرورت ہے، مثلاً ہسپتال، تعلیمی ادارے اور دیگر ضروری ادارے۔اس کے علاوہ، دیگر غیر گھریلو شعبوں میں ایل پی جی کی سپلائی سے متعلق امور کی نگرانی کے لیے آئل مارکیٹنگ کمپنیوں کے تین ایگزیکٹو ڈائریکٹرز کی ایک کمیٹی تشکیل دی گئی ہے۔ یہ کمیٹی ریسٹورانٹس، ہوٹلوں اور دیگر صنعتی اداروں کی جانب سے آنے والی درخواستوں کا جائزہ لے کر فیصلہ کرے گی کہ کس جگہ گیس فراہم کی جائے۔
وزارت نے زور دیا کہ یہ اقدامات اس بات کو یقینی بنانے کے لیے کیے جا رہے ہیں کہ کسی بھی صارف کو غیر ضروری مشکلات کا سامنا نہ کرنا پڑے اور ملک میں ایل پی جی کی سپلائی مستحکم اور شفاف طریقے سے جاری رہے۔تجزیہ کاروں کا کہنا ہے کہ حکومت کے یہ اقدامات صارفین کی سہولت، ہسپتالوں کی خدمات اور تعلیمی اداروں کی کارکردگی کو برقرار رکھنے میں مددگار ثابت ہوں گے اور مارکیٹ میں غیر ضروری اتار چڑھاؤ کو کم کریں گے۔