امریکا کا اپنے شہریوں کو وینزویلا فوری چھوڑنے کا انتباہ

امریکا نے وینزویلا میں بدامنی اور سیاسی بحران کے باعث اپنے شہریوں کو فوری پر ملک چھوڑنے کی ہدایت دی۔

امریکا نے اپنے شہریوں کو فوری طور پر وینزویلا چھوڑنے کی ہدایت جاری کی ہے۔ امریکی وزارتِ خارجہ کے مطابق ملک میں سکیورٹی صورتحال تیزی سے بگڑ رہی ہے اور ایسی اطلاعات موصول ہو رہی ہیں کہ مسلح شہری گروہ اور نیم فوجی دستے مختلف علاقوں میں ناکے قائم کر چکے ہیں۔ ان ناکوں پر نہ صرف عام لوگوں کی نقل و حرکت محدود کی جا رہی ہے بلکہ خاص طور پر امریکی شہریوں اور ان سے منسلک افراد کو نشانہ بنایا جا رہا ہے۔امریکی حکام کا کہنا ہے کہ وینزویلا میں سرگرم یہ مسلح گروہ گاڑیوں کی تلاشی لے رہے ہیں، شناختی دستاویزات چیک کی جا رہی ہیں اور بعض مقامات پر لوگوں کو زبردستی روک کر پوچھ گچھ بھی کی جا رہی ہے۔ وزارتِ خارجہ نے خبردار کیا ہے کہ امریکی شہریوں کو من مانے حراست، تشدد اور دیگر خطرات کا سامنا ہو سکتا ہے، اس لیے وہ کسی تاخیر کے بغیر محفوظ راستوں کے ذریعے ملک چھوڑ دیں۔
یہ انتباہ ایسے وقت میں سامنے آیا ہے جب ایک ہفتہ قبل وینزویلا میں امریکی فوجی کارروائی کی خبریں سامنے آئیں۔ اس کارروائی کے نتیجے میں وینزویلا کے طویل عرصے سے برسرِ اقتدار رہنما نکولس مادورو کو امریکا منتقل کیا گیا، جہاں ان پر اسلحہ اور منشیات کی اسمگلنگ سمیت سنگین الزامات کے تحت مقدمہ چلایا جا رہا ہے۔ امریکی حکام کے مطابق یہ کارروائی بین الاقوامی قوانین کے تحت کی گئی، تاہم اس پر عالمی سطح پر شدید ردِعمل بھی دیکھنے میں آیا ہے۔نکولس مادورو کی گرفتاری کے بعد وینزویلا میں سیاسی خلا پیدا ہو گیا، جس کے نتیجے میں ملک کی نائب صدر ڈیلسی روڈریگز کو عبوری صدر مقرر کیا گیا ہے۔ عبوری حکومت کا دعویٰ ہے کہ وہ ملک میں استحکام بحال کرنے اور جمہوری عمل کو آگے بڑھانے کے لیے کام کر رہی ہے۔
امریکی صدر ڈونالڈ ٹرمپ نے اپنے بیان میں کہا ہے کہ وینزویلا کی عبوری حکومت امریکا کے تعاون سے ریاستی امور چلانے کی کوشش کر رہی ہے، تاہم ملک کے کئی حصوں میں سکیورٹی فورسز پر اب بھی مادورو کے حامی عناصر کا اثر و رسوخ موجود ہے۔ ان کے مطابق یہی وجہ ہے کہ زمینی سطح پر بدامنی برقرار ہے اور عام شہریوں کے ساتھ ساتھ غیر ملکیوں کو بھی خطرات لاحق ہیں۔بین الاقوامی مبصرین کا کہنا ہے کہ وینزویلا میں سیاسی کشیدگی، طاقت کے مراکز میں تقسیم اور مسلح گروہوں کی سرگرمیاں صورتحال کو مزید پیچیدہ بنا رہی ہیں۔ ایسے میں امریکی شہریوں کے لیے فوری انخلا کی اپیل کو ایک سنجیدہ انتباہ سمجھا جا رہا ہے۔